Мемлекет басшысы Қасым-Жомарт Тоқаев "Turkistan" газетіне берген сұхбатында салық реформасына қатысты пікір білдіріп, қоғамда дүрбелең туғызуға негіз жоқ екенін айтты, - деп хабарлайды Аqshamnews.kz тілшісі.
Президенттің сөзінше, мұндай өзгерістер көптеген елде жүріп жатыр, мысал ретінде Ресейде қосымша құн салығының 22 пайызға дейін көтерілгенін келтірді.
"Әрине, салық реформасы – өзекті мәселе және бұған қатысты пікірталастардың болуы әбден түсінікті. Дегенмен, ел ішінде дүрбелең туғызып, жұртты дүрліктірудің ешқандай жөні жоқ. Мұндай реформа көптеген елде жүргізіліп жатыр. Мысалы, Ресейде қосымша құн салығы жуырда 22 пайызға дейін көтерілді", - деді мемлекет басшысы.
Сонымен қатар Мемлекет басшысы қосымша құн салығына қатысты талқылауда бұрынғы Үкіметтің де, қазіргі Үкіметтің де мөлшерлемені 20 пайызға дейін көтеруді ұсынғанын еске салды. Алайда Президент Үкіметке оның жоғарғы шегін 4 сатыға төмендету туралы тапсырма берген.
"Жаңа Салық кодексінде бақылау жасауға емес, өзара серіктестік орнатуға баса мән беріледі, яғни, осы үдеріске қатысушылардың бәрі – мемлекет те, бизнес те, азаматтар да өз міндетін адал орындауға тиіс. Бірін-бірі өзара толықтырып тұратын мұндай жүйеде салық төлеу ауыртпалық ретінде қабылданбайтын болады. Түптеп келгенде, салық төлеу дегеніміз – заманауи қоғамдық келісімшарт деген сөз. Салық төлесеңіз – қызмет көрсетіледі, инфрақұрылым салынады, қауіпсіз орта қалыптасады, тың мүмкіндіктер пайда болады. Керек десеңіз, бұл – әділдік болу үшін жүктемені қайта бөлу құралы, әлеуметтік тұрғыдан әлсіздерді қолдау және экономикалық тұрғыдан «белсенді ортаны» одан әрі дамыту тәсілі", - деді ол.
Сондай-ақ Мемлекет басшысы фискалдық саясаттың тиімділігі оны жүргізудің сапасына, қоғамның салық сауатына және сана-сезіміне байланысты екенін айтып, салық төлеу мәдениеті қалыптасуы керектігін атап өтті. Президент салық төлеуді отаншылдықтың озық үлгісіне теңеп, бұл сыбайлас жемқорлыққа қарсы қоғам құруға ықпал ететінін айтты.
