Алматылық оқушылар тоғызқұмалақтан өткен жарысқа қатысып, Бостандық ауданы әкімінің кубогын сарапқа салды.
Ұлттық құндылығымыздың біріне айналған ойын түрі бүгінде Қазақстан Республикасында ғана емес, халықаралық деңгейде де жоғары қарқынмен дамып келеді. Қазақ халқының ұрпақтан-ұрпаққа жалғасып келе жатқан төл мұраларының бірі – «Тоғызқұмалақ» әлемдік интеллектуалдық ойындардың озық үлгілерімен бой теңестіре алатын зияткерлік ойын, логикалық ойлау өнеріне айналып отыр. Сәтін салса, осы жылдың қыркүйек айында Алматыда оқушылар арасында ІІ дүниежүзілік тоғызқұмалақ ойыны өтеді.
Кубогтық додаға Алматы қаласының 8 ауданы мектептерінің оқушылары қатысты. «Оқушылардың ойынға деген қызығушылығы да ерекше. Бұл жәй ғана ойын емес, оқушылардың бойында ойлау қабілетін арттырады, біліктілік дағдыларын дамытады, төзімділігін қалыптастырады», – дейді Алматы қалалық Тоғызқұмалақ федерациясының директоры Азамат Көпшекбайұлы.
Командалық есеп бойынша І орынды – Жетісу ауданы, ІІ орынды – Наурызбай ауданы, ІІІ орынды – Бостандық ауданы командалары иеленді.
Тақырыпқа орай
Республикалық Тоғызқұмалақ федерациясының президенті, қалалық Мәслихат депутаты Әкім ТҰРСЫН:
– Мемлекет басшысы шығынды аз қажет ететін бұқаралық ойын түрлерін дамытуды тапсырған еді. Бұл қатарда тоғызқұмалақ ойыны да бар. Осы іс-шараның өтуіне Алматы қалалық тоғызқұмалақшылар кеңесінің мүшесі Болат Оспанов ұйытқы болды. Былтыр V дүниежүзілік көшпенділер ойынында тоғызқұмалақшылар үлкен нәтиже көрсетті. Бұл ойын түріне қатысу үшін 41 елдің тоғызқұмалақшылары келді.
Жалпы, Алматы қаласы 2023 жылы дүниежүзілік тоғызқұмалақтың астанасы болып жарияланғалы ерекше қарқын алып келеді. Министр Ербосынов та «қазақ күресі мен тоғызқұмалақты брендке айналдыруымыз керек» деп үлкен мақсат қойып отыр.