Бүгін – «Наурызнама онкүндігі» аясындағы «Тазару күні». Сондай-ақ, әр айдың осы күнінде ел көлемінде «Таза Қазақстан» экологиялық акциясына басымдық беріліп келеді. «Алматы – біздің ортақ үйіміз», «Almaty Clean&Green» – міне, бұның бәрі қаламыздың белсенді жүзеге асырып жатқан экологиялық науқаны.
Бүгін «Alatau-Aqparat» ұжымы өз аумағында сенбілік өткізіп, республикалық және қалалық ауқымды эко-акцияға үн қосты.
Көптен бері жалғасып жатқан экологиялық бастамалардан ұжым өкілдері терең таныс. Қос басылым тілшілері көптеген іс-шаралардың басы-қасында болып ақпарат таратып, игі бастамалардың кеңірек нәсихатталуына күш салып келеді. Ал бүгін тілшілер мен өзге де қызметкерлер ұжым аумағында тазалық жұмыстарын жасап, «Тазару күніне» өз үлестерін қосты.
«Қаламыздағы «Алматы – біздің ортақ үйіміз» экологиялық акциясы көптен бері қызу жалғасып келеді. Қала тұрғындары да бұл акциядан толық хабар тауып, әр жерде қала тазалығы үшін атсалысып жатыр. Бүгін біз өз аумағымызды қоқыстардан арылтып, өзіміз нәсихаттайтын бастамаға шынайы қолдау көрсетіп жатырмыз», – дейді «Алматы ақшам» газетінің бөлім редакторы Рая Есендір.
«Қала тазалығы шағын аумақтардың тазалығынан басталады. Әр мекеме, әр ұжым өз аумағының тазалығына, реттілігіне, көгалы мен көркіне жауапкершілікпен қараса, бұл тұтас қаламыздың таза да жанға жайлы болуына әсер етер еді. Мұндай сенбіліктер тек атаулы күнде емес, әрдайым жекелеген ұжымдардың белсенділігімен өтіп тұрса, осындай тамаша дағды қалыптастырсақ біздің ортақ үйіміз болған Алматы бұдан да көркейе түсер еді», – дейді медиахолдинг қызметкері Сағит Қайыржанұлы.
Айта кетейік, «Алматы – біздің ортақ үйіміз» экологиялық науқаны қаламыздың тазалығын, тұрғындардың орта қорғау танымын арттыру бағытында жүзеге асып жатқан бастама. Бұл әр қала тұрғыны атсалыса алатын әрі айналасына нәсихаттауға тұрарлық ортақ іс. Ұжым қызметкерлері барша қала тұрғындарын эко-шараға атсалысып, қаламызды бірге көркейтуге шақырады.