Қазақстанда экологиялық тепе-теңдікті сақтау және орман алқаптарын кеңейту бағытында ауқымды жұмыстар атқарылып жатыр. Бұл шаралар Мемлекет басшысының «Әділетті Қазақстан: заң мен тәртіп, экономикалық өсім, қоғамдық оптимизм» атты Жолдауын және Президенттің табиғатты қорғау жөніндегі тапсырмаларын жүзеге асыру аясында қолға алынған.
ҚР Экология және табиғи ресурстар министрі Ерлан Нысанбаевтың мәліметінше, соңғы жылдары ел аумағында 1 млрд 369 млн-нан астам көшет егілді. Оның ішінде Арал теңізінің құрғаған түбіне 48,7 млн дана сексеуіл көшеті отырғызылған. Бұл жоба өңірдегі экологиялық апат салдарын жұмсартуға бағытталған.
— «Мемлекеттік орман қоры аумағына ауқымды көлемде ағаш отырғызу жұмыстары жүргізілуде. Әсіресе Арал теңізінің құрғаған аумағына сексеуіл егу – шөлейттенуді тоқтатудың маңызды тетігі», — деді министр.
Орман шаруашылығын тұрақты дамыту мақсатында Қазалы ауданында былтыр жыл соңында жаңа орман питомнигі іске қосылды. Оның аумағы 33 гектарды құрайды және жылына 3 млн көшет өсіруге мүмкіндік береді. Қазіргі таңда агротехникалық талаптарға сәйкес питомниктің 10 гектарына сексеуіл тұқымы себілген.
Бұған қоса, биыл ауданы 15 гектар жаңа питомникті жобалау және Аралдың құрғаған түбінде тікелей ұңғымылар бұрғылау жұмыстары басталды. Бұл шаралар жас көшеттердің өсуіне қажетті су қорын қамтамасыз етуге бағытталған.
«Таза Қазақстан» аясындағы көгалдандыру жұмыстары:
-
елдегі орман алқаптарының көлемін ұлғайтуға;
-
шөлейттенудің алдын алуға;
-
халық үшін экологиялық қолайлы орта қалыптастыруға;
-
су және ауа теңгерімін сақтауға ықпал етеді.
Бұл бастама Қазақстанның ұзақ мерзімді экологиялық қауіпсіздігі мен орнықты даму стратегиясының маңызды бөлігіне айналып отыр.
