«Taza aula – таза аула» экологиялық акциясы өткізілді, – деп хабарлайды aqshamnews.kz тілшісі.
«Taza Qala» экологиялық жобасын іске асыру аясында Алматы қаласы Ішкі саясат басқармасының Қоғамдық даму орталығының ұйымдастыруымен Жетісу ауданы, Айнабұлақ-3 ықшам ауданындағы №135 тұрғын үй ауласында «Taza aula – таза аула» экологиялық акциясы өткізілді.
Іс-шараның негізгі мақсаты - тұрғындар арасында экологиялық мәдениетті қалыптастыру, қоршаған ортаға ұқыпты қарау қағидаларын насихаттау және аула аумақтарының тазалығын сақтау.
Акция барысында тұрғындармен ашық форматта кездесу ұйымдастырылып, қоршаған ортаны қорғау, тұрмыстық қалдықтарды дұрыс сұрыптау және аула тазалығын сақтау мәселелері кеңінен талқыланды.
Іс-шараға әл-Фараби атындағы Қазақ ұлттық университетінің География және табиғатты пайдалану факультеті, ЮНЕСКО-ның тұрақты даму кафедрасының оқытушылары Ольга Александровна Зубова, Лаура Серіковна Курбанова және студент-волонтерлер қатысты.
Сонымен қатар, экологиялық жобалардың кураторы, “Ecominded_t” экологиялық клубының негізін қалаушысы, “Алатауэковтор” компаниясының менеджері, Алматы қаласының эко-амбассадоры Еділ Еркінұлы тұрғындарға қалдықтарды дұрыс сұрыптау бойынша шеберлік сағатын өткізді.
Іс-шара аясында тұрғындар арасында экологиялық сауаттылықты арттыру, тұрмыстық қалдықтарды тиімді сұрыптау және аула тазалығын сақтау бойынша кең көлемді түсіндіру жұмыстары жүргізілді.