Қазақстан СІМ Таяу Шығыстағы әскери-саяси ахуалдың күрделенуіне байланысты күшейтілген режимде жұмыс істеп жатқанын мәлімдеді, – деп хабарлайды aqshamnews.kz тілшісі.
Дипломаттар жергілікті билікпен және Қазақстан азаматтарымен тұрақты байланыста, тәулік бойы жедел чаттар арқылы ақпарат жаңартып отыр. Қазір қазақстандықтар арасында зардап шеккендер туралы мәлімет жоқ.
Таяу Шығыста қанша қазақстандық жүр?
СІМ дерегінше, аймақтағы қазақстандықтардың басым бөлігі БАӘ-де (шамамен 3500), Сауд Арабиясында (3000), Қатарда (1500) орналасқан. Сондай-ақ Иранда 82, Бахрейнде 168, Кувейт пен Иорданияда 134-тен, Израильде 100-ге жуық азамат бар.
Әуе кеңістігінің жабылуына байланысты рейстер тоқтатылған, сондықтан елшіліктер туристік компаниялармен бірге азаматтарды уақытша қонақүйлерге орналастырып жатыр. Сонымен қатар Ираннан көрші елдер арқылы эвакуациялау жолдары қарастырылуда. Армения, Әзербайжан және Түрікменстан тарапы қазақстандықтарды өткізуге және эвакуацияға көмектесуге дайын екенін білдірген.
СІМ азаматтарды сабыр сақтауға, жергілікті биліктің талаптарын орындауға және қауіпті аймақтарға бармауға шақырды.