Бүгінде қай этнос болсын, бәрі де елімізде қалаған жұмысымен айналысып, өз тілін, мәдениетін, салт-дәстүрін сақтап, өркендете алады. Құшағы ыстық, пейілі кең қазақ елі ешкімді кеудесінен итермек емес. Себебі, бұл біздің бабамыздың қанымен келе жатқан ірі қасиет. Сондықтан бізді мекен етіп жатқан басқа этнос өкілдерінің өсіп, өніп, көктеп отырған жеріне алғыс білдіруі орынды.
Алғыс айту күні жақындап келеді. Жылы сөз, ілтипат, түзу пейіл адам жанын нұрға толтырады, жақсылықтарға бастайды. Қазақ жеріне әрдайым ыстық ықыласын білдіруден тартынбайтын жаны ізгі жандардың қатарында алматылық отандасымыз, күрд диаспорасының көрнекті өкілі, меценат, қоғам қайраткері Рафик Якубоглы Мирзоев та бар. Ол бірнеше тілді меңгерген, соның ішінде қазақ тіліне де жетік.
Сондай-ақ, ол көпмәдениетті, көпэтносты мемлекетіміздегі конфессияаралық және этносаралық келісімді нығайту жолында үнемі азаматтық ұстанымын білдіріп, мегаполисте өтетін мәдени-рухани кештердің, қайырымдылық іс-шаралардың белортасынан табылып жүреді.
Тақырыпқа орай
Рафик МИРЗОЕВ, «Құрмет» орденінің иегері, меценат, қоғам қайраткері:
Мен бақыттымын!
Қазақстан халқының, қазақ ағайындардың ортасында өмір сүріп, осы елден өз орнымды тапқаныма ризамын. Маған ғана емес, талай этносқа құтты қоныс, жылы ұя болып отыр. Бәріміз бейбіт таңмен таласа тұрып, өз тірлігімізбен алаңсыз айналысып, кешке шаңырағымызға аман-есен оралудың өзі бір бақыт. Ал ешкіммен араздаспай, жайлы, толыққанды өмір сүру – мың бақыт. Осынау тыныш өмірдің арқасында Қазақстан өсу, өркендеу жолынан таймақ емес.
Біздің Қазақстан халқы Ассамблеясы елімізде орын алған төтенше жағдайлардан ешқашан сырт қалған емес. Барлық этнос біріге кетіп, суға кеткен аймақтардағы отандастырымызға үй салып беруге көмектесті. Осынау сын сағаттарда көпбалалы отбасылардың, мүмкіндігі шектеулі жандардың, қарттардың жанынан табыла білдік. Біздің бірлігіміз, ниетіміз осындай сәттерде көрінеді. Біз өзіміз де осылайша көптің алғысын арқалап жүрміз. Алғыс айту күн бізді бұрынғыдан да жақындастыра түседі деп ойлаймын.