Тәттімбет халық аспаптар оркестрі Түркия төрін өнерлерімен тамсандырды
Түркия елінде болған гастрольдік сапар кезінде Қарағандының Тәттімбет атындағы қазақ халық аспаптары оркестрі 10 мыңнан астам көрермен алдында өнер көрсетіп, домбыра мен қобыз үні арқылы Ұлы дала тарихын жүректерге жеткізе білді, деп хабарлайды Almaty-akshamy.kz
Өнер ұжымы Қазақстан Тәуелсіздігінің 30 жылдығы мен Дүниежүзі қазақтарының кіші құрылтайы аясындағы іс-шараға арнайы шақырылған болатын.
Концерттік бірлестіктің жетекшісі Талғат Ыдырысов кіші құрылтайға қатысып, сонымен бірге Алания, Анталия, Хатай, Газиантеп, Ыстанбұл және Конья қалаларында концерт бергендерін хабардар етті.
Ал Тәттімбет оркестрінің дирижері Ерлан Бақтыгерей болса, түрік көрермендерінің ұлттық музыкалық аспаптарымыздың үніне айрықша таңғалып, ерекше әсерге бөленгендерін атап өтті.
Көпшілік алдында өнер ұжымы Дәулеткерей, Құрманғазы, Тәттімбет, Махамбеттің күйлері мен Нұрғиса Тілендиевтің заманауи әндерін орындаған. Сонымен қатар белгілі түрік композиторларының шығармалары, түрік әндеріне попурри орындалды. Дирижердің айтуынша, көрермендерге ұнағаны соншалық, тіпті олар орындарынан тұрып кетіп, би билеп,ән салған.
Алдағы күндері аталған өнер ұжымы жаңа концерттік маусымын ашады. Оркестр репертуарында қазақ және орыс классиктерінің шығармалары, сондай-ақ гастрольдер бағдарламасынан әндер болады деп жоспарланған.