Алматыда кондоминиум объектісінің ортақ мүлкін күтіп ұстауға жұмсалатын шығындардың ең аз мөлшерін бекіту жөніндегі мәселелерді талқылаған «Дөңгелек үстел» өтті.
Іс-шараға басқарушы компаниялар, ПИК, МИБ/ЖС, қоғамдық ұйымдар және аудандық тұрғын үй-коммуналдық шаруашылық бөлімдері өкілдері, мәслихат депутаттары мен қоғамдық кеңес мүшелері қатысты.
«Дөңгелек үстелдің» мақсаты – көппәтерлі тұрғын үйлерді басқару және күтіп ұстаудың минималды тарифін қайта қарап, талқылау.
Алғаш сөз алған Алматы қаласы Коммуналдық инфрақұрылым басқармасы басшысының орынбасары Жанат Жақыпбек тарифтік саясатқа соңғы өзгерістер 14 жылдан астам уақыт бұрын енгізілгеніне тоқталып, бірақ қазір жағдай айтарлықтай өзгергенін атап өтті.
– Алматыда соңғы рет 2010 жылы әкімдік қаулысымен 1 м² үшін 25 теңге мөлшерінде бір жыл мерзімге ортақ мүлікті ұстаудың ең төменгі тарифі бекітілген. Бұл тариф ауланы күтіп ұстауға және көп пәтерлі тұрғын үйлерді күрделі жөндеуге жұмсалған шығындарды (МТҚ) қамтыды. Алайда, содан бері жағдай айтарлықтай өзгерді: құрылыс материалдарының бағасы, жұмысшылардың жалақысы, сондай-ақ тұрғын үй қызметтерінің сапасына қойылатын талаптар өзгерді, – дейді басқарма өкілі.
Ол сондай-ақ, биыл жұмыс тобы кондоминиум нысанын басқару және ортақ мүлікті ұстау тарифін есептегенін атап өтті. Оның айтуынша, шығындардың ең аз мөлшерін есептеу әдістемесіне сәйкес кондоминиум объектісінің ортақ мүлкін басқару және күтіп-ұстау тарифі инфляцияны ескере отырып жыл сайын қайта қаралады.
Бұл ретте есептеулер орташа жылдық инфляция деңгейін ескереді, ол 6% құрайды, бұл өткен 14 жылды ескере отырып, тарифтерді түзету қажеттілігін айтарлықтай арттырады. Сондай-ақ, қазіргі уақытта аулаларды күтіп-ұстау жұмыстары жергілікті бюджет есебінен жүзеге асырылып, көпқабатты тұрғын үйлерді күрделі жөндеуге жұмсалатын шығындар жеке жинақ шотынан қаржыландырылатынын да атап өткен жөн.
Алматы қаласы Тұрғын үй инспекциясы бөлімінің басшысы Дастан Маусымбаевтың айтуынша, тұрғын үйді күтіп ұстау бойынша тарифті белгілеу статистикаға байланысты шешіледі.
– Бүгінгі «Дөңгелек үстел» басына жиналғандағы мақсат – Алматы қаласы бойынша ең төменгі мөлшерде тұрғын үйді күтіп-ұстау шығындарын бекіту мәселесі болды. Қазіргі уақытта бұл мәселе бойынша қоғамдық кеңес мүшелері, басқарманың өкілдері барлығы бірлесе жұмыс жасап жатыр. Жақын арада бір келісімге келіп, шешім шығаратын болады. Мәселен, қазір Астана қаласында тариф – 57 теңге, Қонаевта – 64 теңге болып бекітілген. Өздеріңіз білесіздер, Алматы – үлкен тұрғын үй қоры бар алып мегаполис. Алдағы уақытта статистикаға сәйкес Алматы қаласы бойынша тарифтің ортақ мөлшерінің қанша екенін, ең төменгі мөлшері қанша болатынын есептеп, қорытынды мәмілеге келеді, – дейді Д.Маусымбаев.
«Дөңгелек үстел» басында сөз алған Алматыдағы ПИК қауымдастығының төрағасы Аркадий Рубцовтың пікірінше, бүгінде көптеген нысандарда үйлерді дұрыс күтіп ұстау және олардың қауіпсіз жұмыс істеуін қамтамасыз ету шығындарын өтемейтін тарифтер бар.
– Алматыда тарифтер соңғы он жылда көтерілмеген. Осы уақыт ішінде тұрғын үйлерді ұстау талаптары айтарлықтай өзгерді, материалдар мен қызметтерге арналған шығындар өсті, басқарушы компаниялар үшін жаңа міндеттер пайда болды. Мәселен, тұрғындардың қауіпсіздігін қамтамасыз ету және тұрғын үй қауіпсіздігі саласындағы қосымша стандарттарды сақтау, т.с.с. Бұл өзгерістер ағымдағы тариф деңгейінде өтелмейтін елеулі қосымша шығындарды талап етеді, – дейді ол.
«Дөңгелек үстел» басына жиналғандар Қазақстанның басқа өңірлеріндегі көпқабатты үйлерді басқарудың тарифтері жоғары екенін тілге тиек етті.
– Бүгін тариф саясатына байланысты өте қызу пікірталас өтті. Мен барлық мүдделі тараптардың бұл мәселеге бей-жай қарамай, тұрғын үйлерге қатысты бұдан басқа да мәселелер бар екенін айтып, ой бөліскендеріне қуаныштымын. Қазір Алматыда ең төменгі тариф бар. Мамандар оны 56 теңгеге дейін көтеруді ұсынып отыр. Дұрыс деп есептеймін, – дейді «Тұран» ПИК қауымдастығының жетекшісі Бибігүл Жүнісбаева.
«Дөңгелек үстелде» тарифке өзгерту енгізу Алматыға да қажет екені айтылды. Қалалық Коммуналдық инфрақұрылым басқармасы басшысының орынбасары Жанат Жақыпбек алдағы уақытта сарапшылардың идеялары тарифтік саясатты түзету бойынша жаңа ұсыныстарды әзірлеу кезінде мұқият қарастырылып, ескерілетінін атап өтті.
Айта кетейік, көппәтерлі үйлерді күтіп-ұстау тарифтерін түзету тек экономикалық қана емес, сонымен қатар азаматтардың өмір сүру сапасына тікелей әсер етеді. Сондықтан қаржылық қолжетімділік пен қызмет көрсету сапасына әсер ететін барлық факторларды ескеру маңызды.
Жиын соңында ұйымдастырушылар жергілікті атқарушы органдардың ұсыныстарын талқылап, әзірлегеннен кейін қорытынды дайындалып, одан әрі қарауға және шешім қабылдауға жіберілетінін айтты.
Керек кеңес
Тұрғын үйді күтіп-ұстау тарифі – бұл кондоминиум объектісінің ортақ мүлкін күтіп-ұстауға және басқаруға қажетті шығындар үшін пәтер иелерінен жиналатын төлем мөлшері. Мамандардың айтуларынша, тарифтің мөлшері заңнамаға, ортақ жиналыс шешімдеріне және үйдің техникалық жағдайына байланысты бекітіледі.