Танымал музыкатанушы, өнертану кандидаты, қазақтың дәстүрлі музыкасын зерттеуші және ұстаз Әлия Сабырова 58 жасында көз жұмды, - деп хабарлайды aqshamnews.kz тілшісі.
Ол отыз жылға жуық дәстүрлі музыкалық мәдениеттер мен түркі әлемінің музыкасына арналған пәндерді оқытып, авторлық арнайы курстар әзірледі. Қазақстанда алғаш болып "Әлем халықтарының музыкасы" атты оқу курсын құрды.
Ғылыми жетекшілігімен 50 жуық магистрлік және 3 докторлық диссертация қорғалды. Консерваторияның ғылым хатшысы, қазақ және шетел музыка тарихы кафедрасының меңгерушісі қызметтерін атқарды.
"2009–2010 жылдары "Музыка әлемінде - В мире музыки" журналының бас редакторы болды. Телебағдарламалар жүргізіп, ғылыми экспедицияларға қатысып, іргелі еңбектерді редакциялады. Ғылыми ізденістерінде Абай мен Шәкәрім мұрасына арналған зерттеулері ерекше болды", - делінген хабарламада.
Әріптестері оны еңбекқор, бастамашыл, кәсібіне адал, жаңашыл ғалым ретінде ерекше бағалады. Студенттермен тең дәрежеде тіл табысып, олардың дербес ойлауына жол ашып, дәлдік пен дереккөзге талап етті.