Франция Президенті Эммануэль Макронның қазақ тазыларымен түскен бейнеролигі әлеуметтік желілерде кең таралды, деп хабарлайды aqshamnews.kz
Бұл бейнероликте Макрон қазақы тазы күшіктерімен жылы жүзбен әңгімелесіп, оларды еркелетіп отырғаны көрінеді. Бұған дейін, Қазақстан Президенті Қасым-Жомарт Тоқаев Франция басшысына қазақтың дәстүрлі аңшылық иттерінің бірегей тұқымы саналатын екі тазы күшігін сыйға тартқан болатын.
Тазыларға Жюль және Жанна деген жарасымды француздық есімдер берілді. Бұл таңдаудағы символизм де ерекше: француз жазушысы Жюль Верн мен тарихи тұлға Жанна д’Арктың құрметіне қойылғандай. Осылайша, тазы күшіктері екі ел арасындағы достықтың белгісіне айналды. Макронның өзі де бұл сыйлыққа ризашылық білдіріп, қазақ халқының ұлттық құндылықтарын қадірлейтінін атап өткен еді.
Сіздерді Жанна және Жюльмен таныстырамын – бір жыл бұрын Қазақстанға мемлекеттік сапарым барысында Президент Тоқаев сыйлаған екі тазы. Немомен бірге тамаша үштік!, деп жазды Эммануэль Макрон өзінің Instagram парақшасында.
Тазылар – Қазақстанның мәдени мұрасы мен аңшылық дәстүрінің ажырамас бөлігі болып табылады. Ежелден бері қазақтар бұл иттерді адалдығы мен аңшылық шеберлігі үшін жоғары бағалаған. Тазылардың Франция Президентінің үйінде жаңа ортаға үйреніп, шынайы достықтың символына айналғаны Қазақстан мен Франция арасындағы байланыстардың мәдени көпірі болып тұр.