ҚР Премьер-Министрінің орынбасары Тамара Дүйсенова Астанадағы №101 орта мектептегі алғашқы қоңырау шарасына қатысты, деп хабарлайды aqshamnews.kz.
Білім ошағы Мемлекет басшысының тапсырмасы бойынша «Жайлы мектеп» ұлттық жобасы аясында биыл бой көтеріп, қолданысқа енгізіліп отыр.
Вице-премьер ғимаратты тұрғызуға күш салған құрылысшыларға алғысын білдірді. Мұнда 4 мыңнан аса бала екі ауысымда білім алатын болады. Есілдің сол жағалауында орналасқан білім ошағында 99 оқу кабинеті қарастырылған, оның ішінде 6-ауы компьютерлік, 10 мамандандырылған сынып.
Одан бөлек, ғимаратта 4 спорт залы, асхана, кітапхана, психолог бөлмесі де бар. Сыныптарда интерактивті тақталар орнатылған. Алғашқы оқу маусымына аяқ басқан мектепті аралаған Тамара Дүйсенова ұстаздарға сәттілік тіледі.