Қазақстан Республикасы Премьер-Министрінің орынбасары Тамара Дүйсенова Ақтөбе облысына жұмыс сапары барысында педагогтармен кездесуінде Қазақстанда атом электр станциясын (АЭС) салу тақырыбын қозғады.
«6 қазанда атом электр станциясын салу бойынша референдум өтеді. Қоғамда түрлі пікірлер бар. Мен бұл мәселені әлеуметтік сала тұрғысынан қарастыруды ұсынамын. Қазір елімізде шамамен 8 мың мектеп, 6 мыңға жуық медициналық ұйым және 10 мыңға жуық мектепке дейінгі мекеме бар. Бұл ұйымдар желісі кеңейіп, сәйкесінше электр энергиясына деген сұраныс та артады. Атом электр станциясынан қорқудың қажеті жоқ деп ойлаймын. 1959 жылдан бері Алматыда Ядролық физика институты жұмыс істеп келеді, онда реактор орнатылған және олар ғылыми қызметпен айналысады. Олардың жұмысына ешқандай шағым жоқ. Азаматтар алдағы референдумға белсенді қатысып, өз таңдауларын жасауы керек», – деп атап өтті Тамара Дүйсенова.