АЛМАТЫ. AQSHAMNEWS.KZ Чжэцзян провинциясындағы Юй ауылы қоршаған ортаны ластайтын өндіріс орындарын жауып, жасыл экономиканы дамыту арқылы мол пайдаға кенелуде.
Юй ауылының әр ғимараты күн сәулесінен қуат алады, ал көліктер тек электр қуатымен жүреді. Таза ауа, мөлдір бұлақтар мен сұлу табиғат туристерді жыл сайын көбірек тартып отыр. Туризмнен түскен табыс ауыл тұрғындарына теңдей бөлінеді, себебі ауылдың көркеюіне жергілікті халықтың үлесі зор.
Юй ауылы Қытайдың шығысындағы Чжэцзян провинциясындағы шағын ауылдардың бірі. Бұрын бұл жерде әктас пен цемент өндірісі болғандықтан, ауа ластанып, тұрғындар қиын жағдайда өмір сүрген. Бірақ 2005 жылы Юй «Жасыл даму» бағдарламасы бойынша пилоттық ауыл ретінде таңдалып, экотуризм мен ауылшаруашылығын дамытуға көшті.
Ауыл ортасында тұрғындардың өмірлік ұстанымы тасқа қашалып жазылған: «Табиғатты аяла! Ол сені – алтынмен аптап, күміспен күптеп есепсіз байлыққа кенелтеді».
«Ауылшаруашылығынан қомақты табыс тауып отырмыз. Мысалы, егін егіп, табиғи таза өнім аламыз. Орман және көлдеріміз ауылымызды экотуризмнің орталығына айналдырды. 1989 жылы біздің провинцияда орман алқабы 57% болса, қазір ол 74% жетті. Біз ең жасыл аймақтардың біріміз», - дейді Цибу қаласы мэрінің орынбасары Джан Цзин.
Юй ауылында климаттың өзгеруі мен қоршаған ортаны зерттейтін Хужоу институты орналасқан. Институт ғалымдары жасыл экономиканы дамыту мәселелерімен айналысады. Ғылыми жаңалықтар осы ауылда іске асырылады, сондықтан Юйдегі ғимараттар экоталаптарға толықтай жауап береді.
«Ауыл-аймаққа инфрақұрылым тартқанда ең әуелі оның қоршаған ортаға әсеріне мән береміз. Жобалық жұмыстардан бастап, оны іске асырғанға дейінгі құрылыс тізбегі мұқият қадағаланады. Осындай бақылаудың арқасында табиғатқа келтірілетін залалдың мөлшері 30%-ға азайып, өңірдегі экологиялық ахуал айтарлықтай жақсарды», - дейді «TsingShan Steel Pipe» корпорациясының өкілі Гуэй Чанзин.
Қытай билігінің жасыл экономиканы дамытуы халықтың әл-ауқатын арттырып, өмір сапасын жақсартты. Бұл елдің инвестициялық ахуалына да оң әсерін тигізді. Жыл сайын миллиондаған турист қабылдап, жиылған қомақты түсімді тұрғындарға дивиденд ретінде бөлетін Юй ауылы осының жарқын мысалы.
