ҚР Еңбек және халықты әлеуметтік қорғау министрі Светлана Жақыпова Үкімет отырысында қауіпсіз еңбек жағдайларын қамтамасыз ету және еңбек саласын цифрландыру бойынша жүргізіліп жатқан жұмыстар туралы айтты.
Министрдің мәліметінше, 2024 жылы өндірістік жарақаттардан 1408 адам зардап шегіп, 202 адам көз жұмған. Қазіргі таңда 445 мыңнан астам жұмыс орны зиянды немесе қауіпті деп танылған. Бұл – еңбек қауіпсіздігін арттырудың өзектілігін айқын көрсетеді, деп хабарлайды aqshamnews.kz.
Еңбек министрлігі еңбек саласын жақсарту бойынша 10 негізгі бағытта жұмыс жүргізіп отыр:
• өндірістік тәуекелдерді автоматты түрде бағалайтын Еңбек тәуекелдерінің картасын енгізу;
• еңбек жағдайларын үздіксіз цифрлық бақылауға көшу;
• өндірісте зардап шеккендерге әлеуметтік қолдау жүйесін жетілдіру;
• зиянды еңбекке тартылған қызметкерлерге арнайы төлемдер мен кепілдіктер ұсыну;
• ұжымдық шарттарды электронды форматқа көшіру;
• кәсіподақтардың жедел бақылау құралдарын енгізу;
• кәсіпорындар үшін еңбек қауіпсіздігінің цифрлық бейінін жасау;
• мемлекеттік бақылау тетіктерін жетілдіру;
• реттеуші кедергілерді азайту;
• Халықаралық еңбек ұйымымен ынтымақтастықты кеңейту.
Светлана Жақыпова Қазақстанда Халықаралық еңбек ұйымының жобалық кеңсесін ашу жоспарланып жатқанын да хабарлады.
«Мақсат – әділ, тиімді және заманауи еңбек қауіпсіздігі жүйесін қалыптастыру», – деді министр.