Филиппин билігі Себу провинциясында болған зілзаладан қаза тапқандар саны артуы мүмкін деп қауіптеніп отыр. Қазір құтқару және қалпына келтіру жұмыстары жүріп жатыр, - деп хабарлайды aqshamnews.kz тілшісі.
Жойқын жер сілкінісінен кем дегенде 69 адам көз жұмды. Одан бөлек ондаған адам жарақат алды. Қаза болғандар саны әлі көбеюі ықтимал. Бұл апат елдің орталық бөлігін шарпыды.
Miss Asia Pacific International сұлулық байқауы өтіп жатқан сәтте де дүмпу болды. Видеода қатысушылар мен қонақтар сахнадан қашып шыққаны, төбеден сылақ пен әшекей бөліктерінің жерге құлағаны анық көрінеді. Еconomictimes.indiatimes.com мәліметінше, ешкім зардап шекпеді.
Жер сілкінісінің магнитудасы – 6,9. Эпицентрі Себу аралындағы Бого қаласынан 17 шақырым солтүстік-шығыста орналасқан. Провинцияда төтенше жағдай жарияланды.
Құтқарушылар үйінділер астында қалғандарды іздеп жатыр. Билік халыққа көмек жеткізуді ұйымдастырып жатыр.
Зілзала аймағында ондаған ғимарат толық немесе жартылай қираған. Электр жарығы өшкен, жолдар мен көпірлерде жарықтар пайда болғандықтан көлік қатынасы қиындады.
Бұл жер сілкінісі аймаққа "Буалой" және "Рагаса" атты дауылдар соққаннан кейін бір апта өтпей болды. Филиппин – Тынық мұхитының "Отты белдеуінде" орналасқандықтан, жиі жер сілкінісі мен жанартау атқылауына ұшырайтын ел.