Біреуі – шахмат тарихындағы блицтан ең жас әлем чемпионы Бибісара Асаубаева, екіншісі – теннисші Елена Рыбакина.
«Қазпошта» «Қазақстан чемпиондары» тақырыбында «Спорт» сериясымен пошта маркасын шығарған, деп хабарлайды Almaty-akshamy.kz.
Пошта маркаларында шахматшы Бибісара Асаубаева мен теннисші Елена Рыбакина бейнеленген.
«Пошта маркалары «Қазпошта» АҚ Шахмат және Теннис федерацияларымен бірігіп шығарылып, айналымға енгізілді. Маркалар спортшыларға ерен еңбегі үшін арнайы шығарылды. «Қазпошта» осылайша чемпиондарға көркемдік маркалар шығарып, құрмет көрсетті. Бұл бүкіл Қазақстан халқының даңқты спортшыларымызға, ару қыздарға көрсеткен құрметі деп білемін. Бүгін филателистер өз коллекцияларын чемпиондардың атаулы маркаларымен толықтыруда», – деді «Қазпошта» АҚ Басқарма төрағасы Әсел Жанасова.
Бибісара Асаубаева – шахмат тарихындағы блицтан ең жас әлем чемпионы. Рапидтен әлем чемпионатының күміс жүлдегері, Азия чемпионы, Қазақстан Республикасының еңбек сіңірген спорт шебері.
Елена Рыбакина – теннисші, Уимблдон-2022 жекелей сынында Үлкен дулыға жеңімпазы, WTA жекелей сынында бес турнирдің жеңімпазы; 18 жасқа дейінгі жасөспірімдер командалық біріншілігінде Еуропа чемпионы.
Марка офсеттік мөрмен басып шығарылған, 4 бояумен боялған, перфорация – рамалық. Шығарылым формасы – екі маркалы пошта блогы. Блоктың мөлшері – 120х48 мм. Марка мөлшері – 52х29,6 мм. Номиналы – 600 теңгеден. Таралымы – 10 000 блок. Дизайнын І.Оңғарбай жасаған.