Таиландта бокстан лицензиялық турнир: қазақстандық спортшылар Париж Олимпиадасына жолдама үшін күреседі
Екі күннен кейін Таиланд астанасында бокстан бүкіләлемдік лицензиялық турнир басталады. Бұл жарыс Париж Олимпиадасына жолдама беретін соңғы мүмкіндіктердің бірі болып табылады. Қазақстан атынан бұл турнирде 6 спортшы қатысады, деп хабарлайды аlmaty-akshamy.kz.
Ерлер арасында 63,5 келі салмақ дәрежесінде Мұхамедсабыр Базарбайұлына үлкен сенім артылып отыр. Өткен айда Астанада өткен спаррингтік бәсекеде ол барлық үміткерлер арасынан жеңімпаз атанған болатын. Дегенмен, сәуір айында Италияда өткен іріктеу турнирінде ол жеңіліп қалған еді.
Әйелдер арасында Назым Қызайбай (50 келі), Ұлжан Сәрсенбек (54 келі), Римма Волосенко (60 келі), Наталья Богданова (66 келі) және Валентина Хальзова (75 келі) шаршы алаңға шығады.
Ертең, 23 мамырда, Бангкокта турнирдің жеребесі тартылып, отандық былғары қолғап шеберлерінің қарсыластары анықталады. Ал 24 мамырда алғашқы жарыс күні бастау алады.
Айта кетейік, қазіргі уақытта еліміздің ерлер құрамасында 6, ал әйелдер командасында 1 ғана жолдама бар. Париж Олимпиадасы 26 шілдеде басталып, 11 тамызға дейін жалғасады.