Былтыр олардың саны 10 мыңнан асқан.
Шымкенттің хайуанаттар бағындағы ерекше жануардың бірі, қуысмүйізділер тұқымдасына жататын жабайы сиыр төлдеді, деп хабарлайды Almaty-akshamy.kz аталған зообақтың мәліметіне сілтеме жасап.
«Бұл – әлемдегі тарихи жағдайлардың бірі. Себебі ХХ ғасырдың бірінші ширегінде Еуропадағы табиғи және антропогендік жағдайлардың әсерінен зубр саны 30 бас қана болды. Соңғы есеп бойынша, 2023 жылы олардың саны 10 мыңнан асқан. Оның 3 мыңға жуығы қорықтар мен зоосаябақтарда тіршілік етеді», - деді Шымкент мемлекеттік хайуанаттар бағының өкілдері.
Зубр – Еуропадағы ең ірі тұяқты жануар. Олардың денесінің ұзындығы 3,5 метрге дейін жетеді, ал биіктігі 2 метрден асады, салмағы 1 тоннаға баруы мүмкін.
«Қазір зубр бұзауының жағдайы жақсы. Ветеринарлық дәрігерлер мен биологтардың күнделікті бақылауында. Зообақ көрермендеріне зубр бұзауын көруге мүмкіндік бар. Ол жаңбырды қатты ұнатады және шеңбер жасап айналғанды жақсы көреді», - деді хайуанаттар бағының мамандары.
Қазір олар зубрдың бұзауына қоятын жаңа ат ойластырып жатыр.