Қазақстан Республикасы Экология және табиғи ресурстар министрі Ерлан Нысанбаевтың Шығыс Қазақстан облысына жасаған жұмыс сапары өңірдің орман қорын дамытуға бағытталған нақты шаралармен жалғасты. Министрдің сапарының басты мақсаты – Мемлекет басшысының тапсырмасы аясында ормандарды қалпына келтіру, орман шаруашылықтарының жұмыс барысын бақылау және өрт маусымына дайындықты пысықтау болды. Бұл туралы Aqshamnews.kz сайты хабарлайды.
Сапардың алғашқы бөлігінде министр Ерлан Нысанбаев Ұлан және Шемонаиха аудандарының мемлекеттік орман қоры аумақтарын әуеден бақылап шықты. Бұл бақылаудың басты мақсаты – орманды алқаптардағы қалпына келтіру жұмыстарын көзбен көру және ағаш отырғызу деңгейін бағалау болды. Шолу барысында кейбір аумақтарда орман жамылғысының төмендегені, ал кейбір жерлерде көшет отырғызу жұмыстарының қарқын алғаны байқалды.
Министр Верх-Уба орманшылығындағы питомниктердің жұмысымен танысты. Мұнда орманды қалпына келтіру үшін жыл сайын миллиондаған көшет дайындалып, аймақтың әртүрлі бөліктеріне отырғызылады. Бұл жұмыстар ұзақ мерзімді экологиялық стратегияның бір бөлігі саналады. Мамандардың айтуынша, көшеттердің жерсіну деңгейі жылдан жылға артып келеді. Бұл климаттық жағдайларға бейімделген сұрыптар мен жаңа агротехнологиялардың қолданылуы арқасында мүмкін болып отыр.
Сапар аясында Ерлан Нысанбаев «Риддер орман шаруашылығы» КММ-не барып, орман мекемесінің техникалық жабдықтарын тексерді. Атап айтқанда, өрт сөндіру көліктері, тракторлар, топырақ өңдейтін және көшет отырғызатын құрал-жабдықтар назарға алынды. Министр орман мекемелерінің дайындық деңгейін оң бағалап, бірақ техника паркін жаңарту қажет екенін атап өтті.
Сапар соңында министр табиғат қорғау мекемелерінің, ерекше қорғалатын табиғи аумақтардың басшыларымен кеңес өткізді. Кеңесте ағымдағы жылдың орман өрттеріне қарсы дайындық шаралары, еріктілермен жұмыс, халықты ақпараттандыру, өрт ошақтарын ерте анықтау жүйелері сөз болды. Сонымен қатар, цифрлық мониторинг пен GPS бақылау құралдарын пайдалану арқылы өрттерді алдын ала болжау мен әрекет ету тетіктері пысықталды.
Ерлан Нысанбаевтың Шығыс Қазақстан облысына сапары орман шаруашылығы саласындағы жүйелі жұмыстардың маңызын тағы бір мәрте көрсетті. Мемлекет тарапынан көрсетіліп жатқан қолдаулар мен жаңа технологияларды қолдану нәтижесінде өңірде орман алқаптарын қалпына келтіру жұмыстары қарқынды жүргізілуде. Өрт маусымына дайындық, техникалық жарақтану мен кадрлық қамтамасыз ету де министрлік назарында тұр.