Шығыс Қазақстан облысында полицейлер үздік жас жол инспекторларын анықтады, – деп хабарлайды aqshamnews.kz тілшісі Altainews.kz -ке сілтеме жасап.
ШҚО Полиция департаменті облыстық білім басқармасымен бірлесіп Өскеменде жас жол инспекторларының облыстық жарысын ұйымдастырды. Ауқымды шараның негізгі мақсаты балалар арасындағы жол-көлік жарақатының алдын алу және оқушылардың жол жүру ережелері бойынша білім деңгейін арттыру болды.
Байқауға облыстың қалалары мен аудандарынан келген 10 мектеп командасы қатысты.
Қатысушыларға ШҚО ПД әкімшілік полиция басқармасы бастығының орынбасары, полиция полковнигі Игорь Клишин құттықтау сөз арнап, жас инспекторлардың қоғамдағы жауапкершілігі жоғары екенін атап өтті.
– Өз үлгілеріңмен сендер бүгінде жол қауіпсіздігін қамтамасыз етуге үлес қосып келесіңдер. Сендердің арқаларыңда заң мен тәртіпті құрметтейтін саналы азаматтардың жаңа буыны қалыптасып келеді, – деді ол.
Жарыс бағдарламасы алты кезеңнен тұрды. Атап айтқанда, қатысушылар «Жас реттеуші», «Жас санитар», «Эрудиттер турнирі», «Жол жүру ережелерінің білгірлері», «Топтық таныстыру» және «Велосипедті мәнерлеп жүргізу» сайыстарында бақ сынады. Әр кезеңде оқушылар жол қауіпсіздігі саласындағы теориялық білімдері мен тәжірибелік дағдыларын көрсетті.
Қорытындысында бірінші орынды Өскемендегі Ахмет Байтұрсынұлы атындағы №20 орта мектептің командасы иеленді. Екінші орын Глубокое ауданының жас жол инспекторларына бұйырса, үздік үштікті Алтай ауданының командасы түйіндеді.