200 еуро мен 31 келіден асатын тауар үшін электронды сауда декларациясын тапсыру қажет, деп хабарлайды aqshamnews.kz
Премьер-министрдің орынбасары - ұлттық экономика министрі Серік Жұманғарин маркетплейстерден тауар сатып алғанда декларация тапсыру тәртібін түсіндірді.
"Бүгінде 200 еуро мен 31 келі деп отырмыз. Осы шектеудің аясында декларация үшін ақы алынбайды. Сондықтан бұл жерде ештеңе өзгермейді. Ал шекті нормадан асқан тауарлар үшін декларацияның ақысы шамамен 4000-5000 теңгедей болады. Оператор оны өзі белгілейді", - деді Жұманғарин.
Айта кетері, мәжіліс депутаттары 2017 жылғы 11 сәуірдегі Еуразиялық экономикалық одақтың Кеден кодексі туралы шартқа өзгерістер енгізу туралы хаттаманы ратификациялауға арналған заңының жобасын қарауға кірісті.