Бүгін Құрманғазы атындағы Қазақ ұлттық консерваториясының профессоры, белгілі күйші, шертпе күй шебері, ҚР Еңбек сіңірген қайраткері Біләл Алпанұлы Ысқақовтың 70 жасқа толуына орай ұйымдастырылған «Қазіргі заманғы шертпе күй орындаушылық өнеріндегі өзекті мәселелер» атты Республикалық дөңгелек үстел өтті.
Алқалы жиында Құрманғазы атындағы консерваторияның профессоры, ҚР Еңбек сіңірген қайраткері Кәрима Сахарбаева, М.О.Әуезов атындағы Әдебиет және өнер институты «Музыкатану» бөлімінің меңгерушісі, өнертану ғылымдарының кандидаты Айнұр Қазтуғанова, «Көне музыкалық аспаптар» кафедрасының меңгерушісі З.Ізмұратова, «Домбыра» кафедрасының ұстаздары Қуаныш Жұмағалиев, Баян Игілік, Алтынай Джумагалиева, Әсел Алина және т.б. Біләл Ысқақовтың өмірі мен шығармашылығы жайында баяндама оқыды.
Зерттеуші-ғалым Айнұр Қазтуғанова «Күйшілер тәлімінің жанашыры» атты баяндамасында Ысқақов Біләл Алпанұлының күйші-орындаушы, күйші-ұстаз, күйші-зерттеуші ретінде қызметін саралай келе, «Ұлы күйшілерден бастау алған дәстүрді жалғастырушы, оны дамытуға өзіндік үлес қосып, ұлттық күй өнерін жаңа деңгейге көтеріп, болашақ ұрпаққа аманат ретінде сақталуда елеулі еңбек еткен тұлға ретінде Біләл Алпанұлы Ысқақов құрметке лайық», – деп тұжырымдады.
Сондай-ақ іс-шараның құрметті қонақтары ҚР Мәдениет қайраткері, Құрмет орденінің иегері, күйші Абдулхамит Райымбергенов, Қазақстанның Еңбек сіңірген қайраткері, күйші-композитор Ермұрат Үсенов, Қазақ ұлттық өнер университетінің оқытушысы, режиссер-продюссер Сарыбасов Оралбек, «Музыкатану және композиция» кафедрасының доценті, PhD Айжан Бердібай, «Халық әні» кафедрасының меңгерушісі Венера Қаржаубаева, PhD, «Дарын» Мемлекеттік жастар сыйлығының иегері, «Домбыра» кафедрасының доценті Ержан Жәменкеев және Семейден, Астанадан, Талдықорғаннан келген әріптестері, шәкірттері ыстық ықыласын білдірді.
Дөңгелек үстелді жүргізген Тоқжанов Төлепберген мерейтой иесіне тосын сый ретінде Б.Ысқақов пен Т.Тоқжановтың авторлығымен шығарылған «Домбырадағы орындаушылық өнер тарихы» атты кітапты тарту етіп, тұсауын кесті.
Күйші Біләл Алпанұлы Ысқақовтың мерейтойы ертең өтетін «Кәусәр күй» атты концертке ұласады. Концерт Құрманғазы атындағы Қазақ ұлттық консерваториясының Е.Рахмадиев атындағы Үлкен залыда, сағат 17:00 өтеді. Келем деушілерге есік ашық.
