2026 жылы 26 маусым күні сағат 14:00-де Қытай Халық Республикасының Шанхай тарихи музейінде (Shanghai History Museum) Алматы қаласы музейлер бірлестігінің «Дәстүр сабақтастығы: ата-баба мұрасы» атты халықаралық көрмесі салтанатты түрде ашылады, – деп хабарлайды aqshamnews.kz тілшісі.
Іс-шара Алматы қаласы әкімдігінің, Қазақстан Республикасының Шанхай қаласындағы Бас консулдығы және Шанхай қаласы мэрінің қолдауымен ұйымдастырылып отыр.
«Дәстүр сабақтастығы: ата-баба мұрасы» халықаралық көрмесінің жоспарға енгізілуіне Алматы мен Шанхай қалалары арасындағы бауырластық қатынастардың орнатылуы («Қытай – Орталық Азия» екінші саммиті, Астана қаласы, 2025 жылғы 16-18 маусым) негіз болды.
Сондай-ақ, 2026 жылғы 7-8 сәуір аралығында Шанхай қаласының мэрі Гун Чжэн Алматыға ресми іс-сапармен келіп, қала әкімі Дархан Сатыбалдымен кездесуі барысында екі мегаполис арасындағы стратегиялық әріптестікті дамыту және өзара ынтымақтастықты кеңейту мәселелері кеңінен талқыланған болатын.
Алматы қаласы музейлер бірлестігі мен Шанхай тарихи музейі арасындағы бауырластық қарым-қатынастың жалғасы ретінде ынтымақтастық туралы меморандумға қол қойылып, оның аясында Алматы музейінің көрмесін Шанхай тарихи музейінде ұйымдастыру туралы шешім қабылданды.
Шанхай тарихи музейі (Shanghai History Museum) – Шанхайдың тарихи орталығында орналасқан мемлекеттік музей. Музей қорында қаланың 6000 жылдық тарихын қамтитын ежелгі дәуірден XX ғасырдың ортасына дейінгі 30 000-нан астам тарихи жәдігер сақталған.
Көрменің негізгі мақсаты – Қазақстан мен Қытай Халық Республикасы арасындағы мәдени байланысты нығайту, сондай-ақ қазақ халқының бай мәдениеті мен тарихын таныстыру, рухани және материалдық мұраны сақтау мен дәріптеуге ықпал ету.
Көрмеде Алматы қаласы музейлер бірлестігі қорынан 100-ге жуық жәдігер қойылады. Олардың қатарында қазақ халқының этнографиялық мұрасын, тұрмыс-салты мен дәстүрін танытатын құнды жәдігерлер, Алматы қаласының тарихы мен қазіргі өмірін бейнелейтін фотосуреттер және халқымыздың ұлттық музыкалық мәдениетін дәріптейтін дәстүрлі музыкалық аспаптар бар.
Алматы қаласы музейлер бірлестігі – еліміздің мәдени және қоғамдық өміріне белсенді үлес қосып келе жатқан заманауи мәдени мекеме. Соңғы жылдары бірлестік халықаралық серіктестік бағытында айтарлықтай табысқа қол жеткізді.
Музей қорларындағы ерекше топтамалар бұған дейін Оңтүстік Корея (Сеул), Австрия (Вена), Франция (Париж), Италия (Неаполь), Чехия (Прага), Сербия (Белград), Мажарстан (Карцаг), Түркия (Ыстанбұл), Нидерланд Корольдігі (Амстердам) қалаларында сәтті таныстырылды.
«Дәстүр сабақтастығы: ата-баба мұрасы» көрмесі Ұлы даланың мәдени мұрасын әлемге танытып, қазақ халқының рухани дүниесі мен терең тарихи тамырын айшықтайтын маңызды мәдени оқиға болмақ.
Көрме 2026 жылы 30 тамызға дейін жалғасады.
Сайт: https://almatymuseums.kz/
Instagram: @almatymuseums
Байланыс телефоны: +7 708 820 6179; +7 747 934 94 59