Қазақстандық шахматшы Бибісара Асаубаева Instagram желісінде оқырмандарының сұрақтарына жауап берді. Әйгілі спортшыға жазылушылардың бірі одан жеке өмірі, нақтырақ айтқанда сүйіктісі туралы сұраған, - деп хабарлайды Аqshamnews.kz тілшісі.
Бибісара Асаубаева бұл сауалға тікелей жауап бермей, "махаббат" деген жазуы бар алтын сақинаның фотосын жариялаған.
Айта кетейік, желтоқсан айының аяғында Бибісара Асаубаева блиц бойынша әлем чемпионы атағын үшінші мәрте иеленді. Финалда ол украиналық шахматшы Анна Музычукты жеңген. Жеңісі үшін қазақстандық спортшы 40 мың еуро (шамамен 23,8 млн теңге) сыйақы алған.
Ал қаңтардағы FIDE рейтингінде Асаубаева 2497 ұпаймен 11-орында тұр.
Сондай-ақ Мемлекет басшысы Қасым-Жомарт Тоқаев шахматшыны әлем чемпионатындағы жеңісімен құттықтап, халықаралық турнирлердегі жетістіктері мен шахматтың дамуына қосқан үлесі үшін оны II дәрежелі "Барыс" орденімен марапаттады.
