5-6 наурыз күндері Сеул филармониялық оркестрі Алматыда концерт береді.
Музыканттар Республикалық мемлекеттік академиялық корей театрында өнер көрсетеді. Қайырымдылық концерті Корея Республикасының тәуелсіздігінің 80 жылдығына және Абайдың 180 жылдығына орай ұйымдастырылған, деп хабарлайды aqshamnews.kz. 24.kz-ке сілтеме жасап.
Кеш барысында әлемге әйгілі Вивальди, Чайковский, Гендель және Моцарттың классикалық шығармалары орындалады. Сондай-ақ, корей музыканттары қазақстандық композитор Еркеш Шәкеевтің туындыларын орындайды. Сонымен қатар, оркестр корей театрының солисі Ангелина Югайға сүйемелдеу жасайды. Ол Манарбек Ержановтың «Қуанамын» әнін шырқайды. Сеул филармониялық оркестрі 1945 жылы құрылған. Оның музыканттары әлемнің түкпір-түкпірінде өнер көрсетіп жүр, ал Қазақстанда алғаш рет концерт бермек.
Чон Че Валь, Сеул филармониялық оркестрінің бас директоры:
- Бұл – менің Қазақстанға екінші сапарым болмақ. Алматыда осыдан бір жарым жыл бұрын болғам. Қала мені қатты таңғалдырды. Өте әдемі қала, архитектурасы және жайлы атмосферасы ерекше әсер қалдырды. Алматы – алып бақ іспетті, мұнда жылулық пен жайлылық сезіледі. Біз концертті алматылықтар классикалық музыканың әсемдігін сезініп, тамашалауы үшін арнайы дайындадық. Репертуар көрермендердің талғамына сай таңдалды, сондықтан алматылықтардың сүйікті шығармаларын орындаймыз.