Семейде жүк көлігі асфальт опырылған жерге жартылай түсіп кеткен. Оқиға сәті әлеуметтік желілерде тарап, көпшіліктің қызу талқысына түсті, деп хабарлайды Aqshamnews.kz тілшісі.
Абай облыстық полиция департаментінің мәліметінше, оқиға 14 қыркүйекте Ибраев пен Уранхаев көшелерінің қиылысында болған.
"Жол-құрылыс жұмыстары кезінде жылу торабы маңындағы жол жабыны опырылды. Сол сәтте 37 жастағы жүргізуші басқарған жүк көлігі осы аумақтан өтіп бара жатып, көлігі шңқырға жартылай түсіп кетті. Абырой болғанда, ешкім зардап шеккен жоқ. Тек материалдық шығын болды", - деп мәлімдеді полиция департаментінің баспасөз қызметі.
Ведомство өкілдерінің айтуынша, оқиға орнына дереу полиция қызметкерлері жетіп, аумақ қоршалып, қауіпсіздік шаралары қабылданған. Қазір болған жайттың барлық мән-жайы анықталып жатыр.
Аталған көше жөндеу жұмыстарына байланысты тұрғындар тарапынан бұған дейін де сынға іліккен. Қыркүйек айының басында қала тұрғындары жолдағы олқылықтарға назар аударуды сұраған болатын.
"Семей қаласы полиция басқармасының әкімшілік полиция бөлімі өз құзыреті аясында бұл аумақты тексеріп, Семей қаласының жолаушылар көлігі және автомобиль жолдары бөліміне тиісті нұсқама берді. Қазіргі уақытта Ибраев көшесінде жылу желілерін қалпына келтіру жұмыстары жүргізіліп жатыр. Жұмыс аяқталғаннан кейін барлық қажетті жол инфрақұрылымы қалпына келтіріледі", - деп нақтылады полиция департаменті.