Семейде жол-көлік оқиғасына түскен әйел белгіленбеген жерден өткендіктен әкімшілік жауапкершілікке тартылды, деп хабарлайды Aqshamnews.kz тілшісі.
Абай облысы полиция департаментінің мәліметінше, оқиға 5 ақпанда сағат 18:30 шамасында Семей қаласындағы Би-Боранбай көшесінде болған. 20 жастағы жүргізуші белгіленбеген жерден жолды кесіп өтпек болған әйелді қағып кеткен.
Оқиға орнына патрульдік полиция жедел жетті. 34 жастағы қала тұрғынын медицина қызметкерлері қарап, кейін үйіне жіберген.
Ведомство тексеру қорытындысы бойынша, жолдан өту қағидаларын бұзғаны үшін жаяу жүргіншіге әкімшілік айыппұл салынғанын (әкімшілік жауапкершілікке тартылатынын) мәлімдеді. Полиция азаматтарды жол ережесін қатаң сақтауға шақырып, асығыстықтың ауыр салдарға әкелуі мүмкін екенін ескертті.