Алматылық "Қайрат" футбол клубы Қазақстан Премьер-лигасының екінші турында "Ақтөбені" ұтып, турнир кестесіндегі бірінші орнын сақтап қалды, деп хабарлайды Aqshamnews.kz тілшісі.
Ойын Алматыдағы Орталық стадионда өтіп, алаң иелерінің 1:0 есебіндегі жеңісімен аяқталды.
Кездесудегі жалғыз гол 76-минутта соғылды. Қазақстан құрамасы мен "Қайраттың" шабуылшысы Дастан Сәтпаев мергендік танытып, командасына маңызды үш ұпай сыйлады.
Осы жеңістен кейін алматылық клуб қоржынына алты ұпай жинап, Қазақстан Премьер-лигасының турнирлік кестесінде көш басында қалды. Ал үш ұпайы бар "Ақтөбе" төртінші орынға жайғасты.