Соңғы уақытта әлемде кең таралып келе жатқан ерекше сусын – саңырауқұлақ кофе, яғни саңырауқұлақ қосылған кофе. Кәдімгі кофеге балама ретінде ұсынылатын бұл өнім құрамымен және ағзаға оң әсерімен ерекшеленеді. Бұл жөнінде Aqshamnews.kz хабарлайды.
Мұндай кофенің құрамына чага, рейши, кордицепс және арыстан жалы (ежовик гребенчатый) секілді емдік қасиеті бар саңырауқұлақтар енеді. Гарвард медицина мектебінің мәліметінше, бұл саңырауқұлақтар бейімдеуші (адаптоген) қасиетке ие — яғни, олар ағзаның күйзеліс пен шаршауға төтеп беру қабілетін арттырады.
Саңырауқұлақ кофесінің басты артықшылығы — құрамында кәдімгі кофеге қарағанда кофеин мөлшерінің екі есе аз болуы. Бұл ұйқысыздыққа бейім адамдарға және жүрек-қантамыр жүйесіне түсетін салмақты азайтқысы келетіндерге тиімді.
Зерттеулерге сәйкес, мұндай саңырауқұлақтар:
ұйқы сапасын жақсартады,
көңіл-күй мен зейінді арттырады,
иммундық жүйені нығайтады,
қабыну процестерін азайтуға ықпал етеді.
Саңырауқұлақ қосылған кофенің дәмі — ерекше. Кей адамдар бірден үйренсе, енді біреулерге оның шөптесін иісі мен дәміне бейімделуге уақыт қажет. Дегенмен, оны тұрақты тұтынатындар бұл сусынды біртіндеп жақсы көріп кететінін айтады. Ол кәдімгі кофеге қарағанда жұмсақтау, алайда бой сергітетін әсері бар.
Қазіргі таңда бұл өнімнің нақты емдік әсерін дәлелдейтін кең көлемді клиникалық зерттеулер жеткіліксіз. Ғалымдар саңырауқұлақ кофесінің мүмкіндіктерін жоққа шығармайды, алайда түбегейлі қорытынды жасауға әлі ерте. Соған қарамастан, табиғи өнім ретінде ол тұтынушылар арасында танымалдыққа ие болуда.
АҚШ, Канада және Еуропа елдерінде саңырауқұлақ қосылған кофе денсаулыққа пайдалы өмір салтын ұстанушылар арасында кең қолданыс табуда. Көптеген компаниялар осындай кофелерді шығаруға кірісіп, нарықта бәсекеге түсе бастады. Бұл – адамдардың табиғи әрі денсаулыққа пайдалы өнімдерге бет бұра бастағанын көрсетеді.
Саңырауқұлақ қосылған кофе — дәстүрлі кофеден бас тартқысы келетіндерге пайдалы балама. Оның табиғи бейімдеуші қасиеттері ағзаның күш-қуатын қалпына келтіріп, өмір сапасын жақсартуға ықпал етуі мүмкін. Алайда, оның нақты пайдасы жайлы айту үшін қосымша ғылыми зерттеулер қажет. Соған қарамастан, қазіргі кезде бұл өнім салауатты өмір салтын ұстанатындар арасында кеңінен қолданыла бастады.