Сайран көлі аумағында 124 қоқыс жәшігі орнатылды, - деп хабарлайды Aqshamnews.kz.
Алматы қаласы Қоғамдық кеңістіктерді дамыту басқармасының мәліметінше, Сайран су қоймасында демалыс аймағын кезең-кезеңімен көріктендіру жұмыстары жүргізіліп жатыр. Аумағы ресми түрде ашылмаған, нысан әлі пайдалануға берілмеген және көркейтудің бірқатар элементі, соның ішінде қоқыс жәшіктері мен шағын сәулет пішіндер орнату сатысында тұр. Барлық қайта жаңарту кезеңдері аяқталған соң бұл аумақ қажетті инфрақұрылыммен толық жабдықталады: жарықтандыру, демалыс аймақтары және бейнебақылау жүйелері қарастырылған.
Күн сайын Сайран көлінің аумағында 40 қызметкер тазалық жұмыстарын жүргізіп, қоқыс шығару жұмыстарын атқарады. Орта есеппен тәулігіне шамамен 5 тонна тұрмыстық қатты қалдық шығарылады.
Келушілердің жайлылығы мен санитарлық тәртіпті сақтау мақсатында аумаққа 124 қоқыс жәшігі орнатылған.
Сайран көліне күн сайын 3–4 мың адам келеді.
Қоғамдық тәртіп пен қауіпсіздікті қамтамасыз ету мақсатында Алматы қаласының Полиция департаменті, Төтенше жағдайлар департаменті және Құтқару қызметінің қызметкерлері күн сайын халықпен түсіндіру жұмыстарын жүргізіп жатыр. Жүзуге тыйым салынғаны туралы ақпарат беретін қоршау мен ескерту белгілері орнатылған.
Қабылданып жатқан шараларға қарамастан, қоғамдық тәртіптің бұзылу фактілері әлі де тіркелуде: азаматтар көл аумағындағы тәртіп ережелерін бұзып, көгалдандыру элементтеріне және шағын сәулет нысандарға зиян келтіруде, қоқыс қалдырып кетіп жатыр.
Мұндай әрекеттер құрылыс және көркейту жұмыстарын айтарлықтай қиындатып, жоспарланған шаралардың іске асуын баяулатады.
Осыған байланысты, 2025 жылы 21 маусымда сағат 10:00-де Сайран су қоймасының аумағын көркейту және санитарлық жағдайын сақтау аясында су айдынын және оған іргелес аумақты тазалау бойынша сенбілік өткізу жоспарланған.
Сондай-ақ, басқарма қала тұрғындары мен қонақтарын қоғамдық орындарда мәдениет нормаларын сақтауға, коммуналдық қызметкерлердің еңбегіне және қалалық ортаға құрметпен қарауға шақырады. Тазалықты сақтау, көркейту, көгалдандыру және инфрақұрылым элементтерін қорғау – әр адамның саналы қатысуын талап ететін ортақ жауапкершілік.
Экология мен қоғамдық кеңістіктерге жауапкершілікпен қарау — бұл Алматы қаласында жайлы, қауіпсіз және тартымды қалалық ортаны қалыптастыруға әрбір азаматтың қосқан үлесі. Көркейту және өмір сүру сапасын жақсарту бойынша жүргізіліп жатқан жұмыстардың нәтижелерін сақтау және арттыруға ортақ күш-жігер қажет.