Қазақстанның футзалдан ұлттық құрамасының бас жаттықтырушысы Рикардо Кака Евро-2026 іріктеу кезеңінде Армениямен тең ойын (4:4) туралы өз пікірін білдірді, деп хабарлайды aqshamnews.kz
— Бұл ойын осы кезеңдегі соңғы сәтсіз матчымыз болады деп үміттенемін. Әлем чемпионатынан кейін біз эмоциялық тұрғыда қалпына келе алмадық. Бұл турнир әлем чемпионаты емес, сондықтан мотивацияны өзіміз табуымыз керек екенін түсіне алмадық. Бұл мәселені шешу үшін жұмыс жасауымыз қажет, — деді Кака.
Кака құраманың эмоциялары Албания мен Армения ойыншыларынан әлдеқайда төмен болғанын атап өтті:
— Эмоциясыз жақсы нәтиже көрсету мүмкін емес. Жаңа жылдан кейін біз бұдан да күштірек боламыз деп сенемін.
Сонымен қатар, Кака команданың бірнеше маңызды ойыншысынан айырылғанын айтты:
— Кнауб пен Ақбаликов жарақатына байланысты алаңға шыға алмады. Лео да отбасылық жағдайға байланысты тез арада үйіне қайтуға мәжбүр болды. Отбасы бәрінен маңызды, сондықтан оны босаттым.
Каканың айтуынша, Қазақстан құрамасы үшін жағдай әлі де қолайлы:
— Барлық команданың өз қолында мүмкіндігі бар. Егер Қазақстан мен Армения қалған матчтарын жеңсе, тікелей Евро-2026-ға жолдама алады.
Ол жанкүйерлерге жеңіс сыйлай алмағанына іштей өкінеді.