Жолсілтемеде Алматының туристік келбетін айқындайтын көрікті орындар мен ерекше әсерге басымдық берілген, деп хабарлайды aqshamnews.kz тілшісі.
Алматы халықаралық туристік медианың назарын аударды. Reuters ақпарат агенттігі City Memo айдарында «Almaty like a local» («Алматы жергілікті тұрғындардың көзімен») атты жолсілтеме жариялады. Материалда қала Орталық Азияға саяхаттауға арналған дербес бағыт ретінде таныстырылып, оның қала мәдениеті, гастрономиясы және тауға жақын орналасуы кеңінен сипатталған.
Reuters – 1851 жылы Лондонда құрылған халықаралық ақпарат агенттігі. Бүгінде ол Thomson Reuters құрамына кіреді және әлемдегі ірі жаңалық таратушылардың бірі саналады. Агенттік халықаралық бұқаралық ақпарат құралдарымен және кәсіби аудиториямен жұмыс істейді.
Жолсілтемеде Алматының туристік келбетін айқындайтын көрікті орындар мен ерекше әсерге басымдық берілген. Олардың қатарында қаланың тарихи орталығы мен «Алтын шаршы», Көк базар, ұлттық тағамдар ұсынатын мейрамханалар және сәулет ескерткіштері бар. Ал табиғи көрікті жерлер ретінде Shymbulak тау курорты, Тянь-Шань тауының бөктеріндегі туристік бағыттар, Көлсай көлдері мен Шарын шатқалы ұсынылған.
Алматыға барған турист бір сапардың өзінде шаһардың тыныс-тіршілігімен танысып, жергілікті асхананың дәмін татып, тауға да шыға алады. Мегаполис өмірі мен табиғаттың осындай жақын үйлесімі қаланы өзге туристік бағыттардан ерекшелендіреді.
Reuters жариялаған материал қаланы халықаралық деңгейде танытуға және шетелдік саяхатшылар арасында танымалдылығын арттыруға ықпал етеді. Болжам бойынша 2026 жылы Алматыға 800 мыңнан астам шетелдік турист келеді.