Жасақ өз қызметін Қазақстан Республикасының бүкіл аумағында, сондай-ақ одан тыс жерлерде төтенше жағдайлар аймақтарында авариялық-құтқару және іздестіру-құтқару жұмыстарын жүргізу жөніндегі мамандандырылған ұйым ретінде бастады. Жасақтың негізгі мақсаты жету қиын аудандарда, күрделілігі жоғары объектілерде құтқару және іздестіру-құтқару жұмыстарын ұйымдастыру және жүргізу, дүлей зілзалалар, авариялар мен апаттар салдарынан зардап шеккендерге шұғыл көмек көрсету, жасақтың бөлімшелерінің республика аумағында және одан тыс жерлерде құтқару жұмыстарын шұғыл жүргізуге тұрақты дайындығын қамтамасыз ету болып табылады.
Жасақ Алматы қаласында орналасқан және тәулік бойы кезекшілік режимінде. 2012 жылдан бастап Республикалық жедел-құтқару жасағының басшылығында халықаралық дәрежедегі құтқарушы, 1-2 топтағы I санатты сүңгуір, сүңгуірлерді даярлау жөніндегі нұсқаушы Владимир Цой тұр. Мамандардың білімі жер сілкінісі, су тасқыны, техногендік апаттар кезінде іздестіру-құтқару және авариялық жұмыстарды тиімді жүргізуге мүмкіндік береді. Жасақ әрқашан кез келген төтенше жағдайға, әлемнің кез келген нүктесіне шығуға дайын.
Жасақтың негізгі бөлімдері: құтқару, сүңгуірлік, кинологиялық, медициналық-психологиялық, кезекші-диспетчерлік, радиациялық, химиялық және биологиялық қорғау бөлімшесі. Жасақта кең бейінді мамандар, құтқарушы-сүңгуірлер, кинологтар, шағын көлемді кемелердің жүргізушілері, халықаралық деңгейдегі құтқарушылар жұмыс істейді. Барлық құтқарушылар-спортшылар, олардың көпшілігі спорт шебері мен спорт шеберіне үміткерлер, көпшілігінде альпинистердің төсбелгілері бар.