Кино апталығына 47 елден 130-дан астам киноиндустрия, мәдениет министрліктері өкілдері мен сарапшылар делегат ретінде қатысуда, деп хабарлайды aqshamnews.kz.
Талқылаудың негізгі тақырыбы – креативті индустрияны дамыту. Қатысушылар креативті саланы дамыту және қолдау стратегиялары, әлемдегі маңызды трендтер туралы ойларын ортаға салды. Бұл бағытта Қазақстанда атқарылып жатқан жұмыстар туралы Мәдениет және ақпарат вице-министрі Евгений Кочетов айтып берді. Вице-министр креативті индустрияны қолдауға арналған заңнамадағы жаңашылдықтар мен Қазақстандағы таланттарды ынталандыру бағытындағы басқа да шараларға тоқталды.
«Еліміздің барлық аймақтарында креативті және инновациялық орталықтар сияқты мамандандырылған инфрақұрылымды дамыту жобалары жүзеге асырылып жатыр. Сонымен қатар, елімізде қолдау көрсетудің маңызды аспекті – креативті индустрия мен инновация саласындағы мамандарды даярлауға бағытталған білім беру бағдарламаларын әзірлеу», - деп атап өтті Евгений Кочетов.
Сондай-ақ, кино апталығы аясында 300-ден астам шетелдік фильмдердің көрсетілімі жоспарланған.