Биыл Қазақстан Республикасы Су ресурстары және ирригация министрлігі Қызылағаш су қоймасын қайта жаңғырту жұмыстарын сәтті аяқтады.
Жобаның аясында су тасқыны кезінде артық суды жіберуге арналған арна нығайтылып, жаңа су қабылдау тораптары салынды,- деп хабарлайды Aqshamnews.kz
Жаңғырту нәтижесінде нысанға заманауи бақылау датчиктері, автоматтандырылған мониторинг жүйесі және жергілікті хабарландыру жүйесі орнатылды. Сыйымдылығы 42,6 миллион текше метр болатын қойма енді 6 680 гектар егістік алқабын тұрақты түрде сумен қамтамасыз ете алады.
Сала мамандарының айтуынша, бұл жоба өңірдегі ауыл шаруашылығының дамуына оң ықпал етіп қана қоймай, төтенше жағдайлардың алдын алуға да септігін тигізеді.
«Мемлекет басшысы еліміздің су шаруашылығы инфрақұрылымын жаңғыртуды тапсырған болатын. Осы бағытта 2023 жылы гидротехникалық нысандарды түгендеу жүргізіліп, нәтижесінде су саласын дамытудың кешенді жоспары әзірленді. Бұл жоспар 160-тан астам іс-шараны қамтиды, оның ішінде 42 жаңа су қоймасын салу және 37 қолданыстағы нысанды реконструкциялау қарастырылған. Қызылағаш су қоймасын жаңғырту — осы кешенді жұмыстың маңызды бөлігі. Бұл жоба Жетісу облысының ауыл шаруашылығына серпін беріп, тұрғындарды су тасқыны қатерінен қорғауға мүмкіндік береді», — деді Су ресурстары және ирригация вице-министрі Ерболат Ибрайханов.
Қайта жаңғырту жұмыстары — еліміздегі су ресурстарын тиімді пайдалану мен ауыл шаруашылығын тұрақты дамыту жолындағы маңызды қадамдардың бірі. Алдағы уақытта министрлік су инфрақұрылымын жаңарту жұмыстарын жалғастыруды жоспарлап отыр.