Қазақстан мен Әзербайжан жоғары білім саласындағы ынтымақтастықты кеңейтуге бағытталған маңызды қадам жасады. Әзербайжанның АДА университетінде Әзербайжан мен Қазақстан арасындағы жоғары білім саласындағы ынтымақтастықты кеңейтуге арналған дөңгелек үстел ұйымдастырылды, деп хабарлайды aqshamnews.kz
Іс-шара барысында Қазақстан Республикасының Ғылым және жоғары білім министрі Саясат Нұрбек, Әзербайжанның Ғылым және білім министрі Эмин Амруллаев, сондай-ақ екі елдің жоғары оқу орындарының ректорлары бас қосты.
ҚР Ғылым және жоғары білім министрі Саясат Нұрбек екі ел арасындағы жоғары білім мен технологиялар саласындағы ынтымақтастық үшін жаңа мүмкіндіктер ашылғанына тоқталды. Саясат Нұрбек Әзербайжан мен Қазақстан арасындағы бауырластық қатынастар білім беру және ғылыми ынтымақтастықта да өз көрінісін табуы тиіс екенін айтты. Министр қазіргі таңда екі елдің жоғары оқу орындарымен серіктестік жоспары мен инновациялық тәсілдерді жүзеге асыру бойынша жұмыстар жүргізіліп жатқанын атап өтті. Әзербайжан Республикасының Ғылым және білім министрі Эмин Амруллаев Әзербайжан мен Қазақстан арасында білім саласындағы ынтымақтастықты дамыту маңызды екенін айтты.
Дөңгелек үстел барысында 40 меморандумға қол қойылды, оған екі елдің 17 университетінің өкілдері қатысты.
QyzPU делегациясы Басқарма төрағасы – ректор Гүлмира Қанайдың басшылығымен Әзербайжан Мемлекеттік педагогикалық университетінің ректоры Джафар Джафаровпен және Баку Еуразия университетінің ректоры Саявуш Гасымовпен кездесіп, ынтымақтастықты дамытуға бағытталған меморандумдарға қол қойды.
Меморандумдар университеттер арасындағы әріптестікті нығайтып, академиялық ұтқырлық бағдарламалары мен білім алмасу мүмкіндіктерін кеңейтуді көздейді. Тараптар жоғары және жоғары оқу орнынан кейінгі білім, ғылым мен мәдениет, ғылыми-зерттеу саласындағы ынтымақтастықты дамытуға уағдаласты.
Бұл келісімдер студенттер мен оқытушылардың өзара тәжірибе алмасуына, бірлескен ғылыми жобаларды жүзеге асыруға және білім сапасын арттыруға тың серпін береді. Сонымен қатар академиялық ұтқырлық бағдарламасы жастарға халықаралық деңгейде білім алып, мәдени тәжірибе жинақтауға мүмкіндік жасайды.
4-5 наурыз аралығында Баку қаласында «Study in Kazakhstan» шетелдік жастарды Қазақстанда білім алуға шақыруға арналған жәрмеңке өтті. Қазақстан мен Әзербайжанның білім беру саласындағы ынтымақтастығы болашақта да нығая түспек.
