Театр ұжымы Ұлттық кітап күні қарсаңында алматылық көрермен назарына «Орман ғажайыптары» ертегісінің премьерасын ұсынды. Қойылым әлемге әйгілі неміс жазушысы Отфрид Пройслердің балалар әдебиетінің жауһары саналатын «Кішкентай сиқыршы» повесінің желісімен сахналанды.
Балалар әдебиетінің алтын қорынан орын алған бұл шығарма – жақсылық пен зұлымдық, батылдық пен мейірім, адалдық пен ізгілік тақырыптарын қозғайтын ойлы туынды. Спектакльдің режиссері – еліміздегі қуыршақ театр режиссурасының дамуына сүбелі үлес қосып жүрген, ерекше дарынымен танылған талантты өнер иесі Антон Зайцев.
– Бұл – қалыптасқан архетиптерді жеңіп, саналы түрде жақсылықты таңдаған кішкентай қыз жайлы оқиға. Бүкіл әлем сені жамандыққа итермелейді, ал сен болсаң, кішкентай ғана адам бола тұра, жақсылықты таңдайсың. Балаға осыны айтып, оған тіпті өзі де надандыққа, әділетсіз көрінетін дүниелерге қарсы тұра алатынын, сонымен қатар мейірімді болып, жақсы істер жасай алатынын көрсету – мен үшін шын мәнінде үлкен іс, – дейді Антон Зайцев.
Спектакльдің сахналық суретшісі – Ақтөбе облыстық қуыршақ театрының директоры, Қазақстанның мәдениет қайраткері, халықаралық және республикалық қуыршақ театрлары фестивальдерінің бірнеше мәрте «Үздік суретші» номинациясы бойынша жеңімпазы Әсия Құрманалина болды. Жаңа қойылымда 20-ға жуық түрлі қуыршақ түрі қолданылды. Ал сахна кеңістігі құпияға толы кітапхана атмосферасын бейнелейтін қою әрі терең реңктермен көмкерілді.
- Ұлттық кітап күні – рухани байлыққа бас иетін, әдебиеттің құдіретін дәріптейтін ерекше күн. Мемлекеттік қуыршақ театры бұл мерекені кітап пен театр арасындағы алтын көпірді жалғау арқылы атап өтуді жөн көрді. Қойылым барысын тамашалай отырып, көрермен тек ертегі әлеміне сапар шекпейді – ол кітаптың шынайы құндылығын, парақ арасындағы ғажайып өмірді сезінеді. Қойылымның түпкі мақсаты – жас көрерменге кітаптың сиқырлы күшін сезіндіру, оларды оқуға баулу. Бұл – өте маңызды тәрбие. Өйткені, қазіргі сандық заманда кітаптың рухани маңызын бала бойына сіңіру оңай шаруа емес, – деді Мемлекеттік қуыршақ театрының директоры Алмат Амангелді.