Табиғи монополияларды реттеу комитеті 2026–2027 жылдары тарифтерді бұрынғы деңгейде қалдыру туралы шешім қабылдады, – деп хабарлайды aqshamnews.kz тілшісі.
Қазақстан теміржол компаниясы 2026–2030 жылдарға арналған теміржол тарифтерін көтергісі келген. Мекеме бұған инвестициялық бағдарламасының өзгеруін себеп еткен. Яғни, қарызды өтеу мен пайыз төлеуге кететін шығындар артқанын алға тартқан.
Заң бойынша, егер инвестициялық бағдарлама немесе несие шарттары өзгерсе, тарифті қайта қарауға өтініш бере алады.
Алайда Табиғи монополияларды реттеу комитеті 2026–2027 жылдары тарифтерді бұрынғы деңгейде қалдыру туралы шешім қабылдады. Ал 2028–2030 жылдары тарифтерді жылына 4–5% ғана өсіруге рұқсат берді.
Компанияның жаңа өтінішінде тарифтерді айтарлықтай көтеру ұсынылған. Кейбір есептік коэффициенттер тіпті 80%-ға дейін ұлғайтылған. Бұл әлеуметтік маңызы бар азық-түлік тауарларынан басқа барлық жүк түрлеріне қатысты болған.
Бірақ өтінішті қарау кезінде комитет компания барлық қажеттіні растайтын құжаттарды толық ұсынбағанын анықтаған. Сондықтан тарифті көтеру туралы өтініш қанағаттандырылмады.