Министрлер кабинеті бизнес өкілдерімен кездесті.
Онда қосымша құн салығының сараланған мөлшерлемелерін белгілеу жөніндегі ұсыныстар талқыланды, деп хабарлайды aqshamnews.kz
«Біз мынадай тетікті қарастыруды ұсынамыз. Жалпы белгіленген қосымша құн салығының мөлшерлемесі 16%, ауыл шаруашылығы өнімдерін өндірушілерді толық босату, ал бірқатар салалар үшін – 10% мөлшеріндегі аралық мөлшерлеме. Осылайша, Үкімет ұсынып отырған мөлшерлемелерді саралау: 16%, 10%, 0% және босату», - деп түсіндірді ұлттық экономика вице-министрі Азамат Әмрин.
Қазіргі уақытта аграрлық секторда шаруа қожалықтары қосымша құн салығын төлемейтіні, ал заңды тұлғалар қолда бар жеңілдіктерге байланысты бюджетке төлеуге тиісті салықтардың тек 30%-ын төлейтіні атап өтілді. Жаңа тетіктер бойынша олардың ешқайсысы төлем енгізбейді. Бұл қазақстандық ауыл шаруашылығы өнімдерін (картоп, қызанақ, пияз және басқалары) бәсекеге қабілетті етуге мүмкіндік береді.
Ал 10% қолданылатын салалардың түрлері бизнеспен әлі де талқылануда.