Бүгін еліміз үшін айрықша маңызды күн, өйткені Қазақстанның жаңартылған конституциясы күшіне енді, – деп хабарлайды aqshamnews.kz тілшісі.
Бұл туралы әл-Фараби атындағы Қазақ ұлттық университетінің проректоры Еркін Дүйсенов мәлімдеп, аталған оқиғаның тарихи маңызы зор екенін және мемлекеттің ұзақ мерзімді даму бағытын айқындайтынын атап өтті.
Оның айтуынша, конституция – елдің алдағы ондаған жылдардағы стратегиялық даму бағытын белгілейтін және болашақ ұрпақтың өміріне тікелей ықпал ететін негізгі саяси-құқықтық құжат.
«Бұл шын мәнінде халықтық конституция деп толық айтуға болады. Себебі ол қоғамның мүддесін білдіреді, ең алдымен адамға бағытталған», – деді ол.
Сарапшының айтуынша, жаңартылған заңның басты қағидаты – ең әуелі адамның құқығы мен бостандығын қамтамасыз ету, содан кейін ғана қоғам мен мемлекеттің мүддесін қорғау. Оның пікірінше, мұндай ұстаным жүргізіліп жатқан реформалардың демократиялық сипатын айқындап, құқықтық мемлекет құруға бағытталған.
Сонымен қатар ол заң үстемдігі қағидаты мемлекеттік басқарудың жаңа моделінің негізгі өзегіне айналғанын атап өтті. Бұл модельде «заңмен тыйым салынбағанның бәріне рұқсат етіледі» деген қағида басшылыққа алынады.
Еркін Дүйсенов жаңа конституцияда көзделген жаңа институттарға да ерекше тоқталды. Атап айтқанда, ол Халық кеңесінің құрылуын қоғам мен билік арасындағы маңызды байланыс тетігі ретінде бағалап, бұл институт қоғамдық диалогты дамытуға қызмет ететінін және заң шығару бастамасы құқығына ие болатынын айтты.
Сондай-ақ сарапшы вице-президент институтының енгізілуі жоғары мемлекеттік билік жүйесінің тұрақтылығы мен сабақтастығын нығайтуға ықпал ететінін атап өтті.
Жалпы, Еркін Дүйсеновтің пікірінше, жаңартылған конституция демократиялық қағидаттардың нығайғанын айқын көрсетіп, Қазақстанда құқықтық мемлекетті одан әрі дамытуға бағытталған.