Қазақстан 2024 жылы Ұжымдық қауіпсіздік туралы шарт ұйымы (ҰҚШҰ) мен Халықаралық Аралды құтқару қорында (ХАҚҚ) төрағалық етіп, өңірлік қауіпсіздік пен экологиялық тұрақтылықты қамтамасыз ету бағытында маңызды бастамаларды көтерді, деп хабарлайды aqshamnews.kz
ҰҚШҰ-ға төрағалық ету барысында Қазақстан трансшекаралық қылмыс, терроризм және есірткінің заңсыз айналымына қарсы іс-қимылға ерекше назар аударды. 80-нен астам іс-шара өткізілді, оның ішінде мемлекет басшыларының кездесулері, тақырыптық дөңгелек үстелдер мен әскери жаттығулар ұйымдастырылды. Сонымен қатар, Тәжік-ауған шекарасын нығайту бағдарламасы бойынша 10 жылдық жұмыстың аяқталуы маңызды кезең болды.
ХАҚҚ төрағалығы (2024-2026) аясында Қазақстан су-энергетикалық ресурстарды басқарудың тиімді механизмін әзірлеуге және экологиялық бағдарламалардың сапалы іске асырылуына баса назар аударды. Сонымен бірге климаттың өзгеруінің теріс салдарын жеңілдету үшін халықаралық ынтымақтастықты нығайту жұмыстары жүргізілді.
Су дипломатиясы бойынша да Қазақстан үлкен жетістіктерге қол жеткізді. 2024 жылы Қытай, Ресей және Орталық Азия елдерімен трансшекаралық өзендер бойынша 35-ке жуық келіссөздер өтті. Қырғызстан мен Өзбекстанмен Шу, Талас және Сырдария өзендері бойынша су алу туралы келісімдерге қол жеткізілді. Қытаймен Ертіс және Іле өзендері бойынша да келіссөздер жүргізілуде. Қазақстанның БҰҰ-ның Халықаралық су ағындарын кеме қатынасынан басқа пайдалану түрлерінің құқығы туралы конвенциясына қосылуы да су ресурстарын тиімді пайдалану бағытында маңызды қадам болып табылады.
Қазақстанның осы бастамалары өңірлік және халықаралық деңгейде экологиялық және қауіпсіздік мәселелерін шешуде маңызды рөл атқарады.