Қазақстанның Ұлттық банкі елдегі несиелеу нарығының жағдайын жариялады. Бір қызығы мәліметтерді екінші деңгейлі банктер ұсынған, деп хабарлайды aqshamnews.kz.
Ұлттық банк қаржылық тұрақтылық және зерттеулер департаментінің директоры Олжас Кубенбаевтың айтуынша, үшінші тоқсанда жеке тұлғалар тарапынан ипотека мен автокредиттерге сұраныс артқан. Ал кепілсіз несиелер мен кепілмен тұтынушылық несиелерге сұраныс азайған.
«Ипотекаға сұраныстың өсуін банктер мемлекеттік бағдарламалар аясында өтінімдер жинау және құрылысшылармен ынтымақтастықпен түсіндіреді. Ипотекалық өнімдерге сұраныстың артуына бәсекелес банктердің кепілдік қамтамасыз етуге қатаң талаптар қоюы да әсер етті. Нәтижесінде, жалпы кредиттік өтінімдер саны өткен тоқсанмен салыстырғанда 31%-ға артып, 274 мыңға жетті», — деді Олжас Кубенбаев.
Қазақстандықтар автокредиттерге де жиі өтініш бере бастады. Өткен тоқсанмен салыстырғанда бұл көрсеткіш 10%-ға артып, 1,1 миллионды құрады. Бұл жағдай автосалондардың банктер-партнерлер арқылы өз қызметтерін белсенді түрде жарнамалаумен де байланысты.
«2024 жылдың төртінші тоқсанында банктер автокредиттер мен кепілсіз тұтынушылық несиелерге сұраныстың артуын күтеді. Ал ипотекаға және кепілмен берілетін тұтынушылық несиелерге сұраныс өспейді», — деп атап өтті О.Кубенбаев.
2024 жылдың үшінші тоқсанында қазақстандық банктер бизнеске, әсіресе орта және ірі бизнеске, несиелерді жиі мақұлдай бастады. Алайда, бизнес несиелеріне сұраныс бұрынғы деңгейде сақталды. Ірі және шағын кәсіпорындар өткен тоқсанмен салыстырғанда үш пайызға жиі несиеге жүгінген.
Шағын бизнес тарапынан 845 мың несиелік өтінім келіп түсті, бірақ олардың тек әрбір үшіншісі (35%) мақұлданды. Орта бизнестің 41%-ы, ірі бизнестің 51%-ы кредит алды.
Банктердің пікірінше, 2024 жылдың соңғы тоқсанында бизнес несиелеріне сұраныстың одан әрі өсетіні күтілуде.