Бұл шара бүкіл республиканы қамтитын болады.
Қазақсанның Қаржы нарығын реттеу және дамыту агенттігі Алматы қаласының әкімдігімен әлеуметтік аз қамтылған борышкерлерді ипотека қарызы үшін жалғыз баспанасынан шығармау туралы меморандумға қол қойылғанын мәлім етті, деп хабарлайды Almaty-akhamy.kz ҚазАқпаратқа сілтеме жасап.
«23 қыркүйекте Қаржы нарығын реттеу және дамыту агенттігі, Алматы әкімдігі, Банк омбудсмені, банктер және қоғамдық бірлестіктер арасында халықтың әлеуметтік осал топтарына жататын борышкерлердің ипотекалық қарызы үшін жалғыз тұрғын үйін алып қою және жалғыз баспанасынан шығару шараларын тоқтата тұруды көздейтін өзара түсіністік пен ынтымақтастық туралы меморандумға қол қойылды», - деп жазылған агенттік берген түсініктемеде.
Агенттіктің баспасөз қызметі мамандар меморандум жобасымен маусым айынан бері жұмыс істегенін, әзірге меморандум Алматы қаласының әкімдігімен ғана қол қойылғанымен, шара кейін бүкіл республиканы қамтитынын айтады.
«Құжат қол қойылған күнінен бастап күшіне енеді және 12 ай бойы күшінде болады», - деп жазылған агенттіктің ресми мәліметінде.