Мәскеуде өткен «Чемпиондар лигасында» Артур Муциев бірінші орын алды.
17 қаңтарда Мәскеуде BetBoom «Чемпиондар лигасы» өз мәресіне жетті, деп хабарлайды Аlmaty-akshamy.kz
Дүбірлі додаға Халықаралық Пирамида конфедерациясының нұсқасы бойынша ең мықты 8 ойыншы қатысты. Биылғы маусымда турнирге Қазақстан атынан Артур Муциев қатысты. Ол төрт халықаралық дәрежедегі спорт шеберін жеңіп, чемпион атанды.
Жанкүйерлер ойынның тікелей трансляциясын тамашалады. Қазақстандық бильярдтың жанкүйерлері Артур Муциевке зор қолдау көрсетті.
«Бильярд - шеберлікті шыңдайтын ойын. Аса дәлдік қажет. Сәл қиыс көздесеңіз, шар басқа жаққа кетеді. Ал дөп түссеңіз, ұтасыз. Сол дөп түсу үшін де ептілік пен қажыр-қайрат керек. Сәл ғана босаңсып қалсаңыз, қарсылас ұрымтал тұсты бағып тұрады. Сол үшін күнделікті таңғы 11-ден кешкі 6-ға дейін демалыссыз жаттықтым. Менің қарсыластарым оңай болған жоқ, олардың көпшілігі - әлем чемпиондары. Үлкен қателікке бой алдырмау үшін барымызды сала білдік», – деді жеңімпаз Артур Муциев.
«Бұл турнирдегі жеңісімді үлкен жетістік деп санаймын. Бильярд - өте пайдалы ойын, бұған өте дәлдік керек және ұрымтал сәтті күту қажет. Бильярд басқа спорт түрлеріне ұқсамайды, табандылық пен тәртіпке баулиды», - деп ағынан жарылды спортшы.
Қазақстандық бильярд шебері өз тәжірибесімен бөлісіп, жас спортшыларға ақыл-кеңесін айта өтті.
«Бильярдқа құштар жастар көп. Бір нәрсе анық. Барлығы еңбектің арқасында болады. Әрдайым жаттығуларға қатысып, жаттықтырушымен бірге дайындалсаңыз, нәтижесін көресіз. Ол үшін ынта керек. Сонда ғана халықаралық жарыстарда жеңіске жетесіз. Бұл елдің де абыройы болады», – деді . Муциев.