Қазақстанның авиациялық әкімшілігі отандық әуе тасымалдаушыларына Иран аумағының үстімен рейстер орындауға уақытша шектеу енгізді, деп хабарлайды Aqshamnews.kz тілшісі.
Қазақстанның авиациялық әкімшілігі Иран әуе кеңістігіндегі қауіпсіздік тәуекелдерінің артуына байланысты қазақстандық әуе компанияларына бұл аймақ арқылы ұшуға уақытша тыйым салды. Тиісті шешім ҚАӘ таратқан ресми ақпаратта жарияланды.
Ведомствоның мәліметінше, қазіргі жағдайда Иранның әуе кеңістігін пайдалану қатаң шектеліп отыр. Тек ерекше өкім берілген жағдайда ғана бұл талаптан тыс шешім қабылдануы мүмкін.
«Барлық рейстер қауіпті аймақты айналып өтетін балама бағыттар арқылы орындалады. Жағдай Қазақстанның авиациялық әкімшілігінің тұрақты бақылауында. Аймақтағы ахуал өзгерген жағдайда қосымша шаралар қабылданады», – делінген ресми хабарламада.
Еске салайық, Ирандағы жағдай 2025 жылғы 28 желтоқсанда күрт шиеленісе түсті. Алдымен тұрғындар бағаның өсуі мен ұлттық валютаның құнсыздануына наразылық білдірсе, кейін бұл толқулар 2022 жылдан бері жалғасып келе жатқан жаппай наразылықтардың жаңа кезеңіне ұласты. Соңғы бір жылда АҚШ долларының бағамы шамамен 80 пайызға қымбаттаған.