ҰҚШҰ Біріккен штаб бастығы, генерал-полковник Андрей Сердюковтің мәлімдеуінше, Ұжымдық қауіпсіздік туралы шарт ұйымының (ҰҚШҰ) оқу-жаттығулары 2026 жылы ұйымға мүше бірнеше елдерде, соның ішінде Қазақстанда да өтеді, деп хабарлайды aqshamnews.kz
Оның айтуынша, 2026 жылы бірлескен және шұғыл даярлық бойынша 60 іс-шара, оның ішінде сегіз командалық-штабтық және арнайы оқу-жаттығуларды өткізу жоспарланып отыр.
"Қыркүйек айында Қазақстан Республикасының аумағында "Рубеж" Орталық Азия өңірінің жедел өрістету ұжымдық күштерінің бөлімшелерімен бірлескен оқу-жаттығу өткізілмек. Қыркүйек-қазан айларында Ресей Федерациясында "Поиск" ұжымдық жедел әрекет ету күштері мен барлау құралдарын тарта отырып, "Эшелон материалдық-техникалық қамсыздандыру бойынша "Өзара әрекеттесу" командалық-штабтық жаттығулар жүреді. Қазан айында Тәжікстан Республикасының аумағында "Кобальт" арнайы оқу-жаттығуы және "Скала" арнайы оқу-жаттығуы өтеді, - деді спикер.
Сонымен қатар, Беларус елінде "Мызғымас бауырластық" бітімгершілік күштерімен командалық-штабтық оқу-жаттығу және "Тосқауыл" радиациялық-химиялық, биологиялық қорғаныс және медициналық қамтамасыз ету күштерімен бірлесе арнайы оқу-жаттығу өтеді.
Сердюков стратегиялық командалық-штабтық жаттығу кезінде бірлескен жаттығуларға тартылатын ұжымдық күштердің барлық компоненттерін қолдану мәселелері пысықталатынын да нақтылады.