Ел намысын қорғайтын спортшылар әнұранды жатқа білуі керек, деп хабарлайды aqshamnews.kz
Бұған қоса, оны орындау кезінде этикалық нормаларды сақтауға міндетті. Бұл жауапкершілік жеке жаттықтырушылар мен бас бапкерлерге жүктеледі.
Туризм және спорт министрлігі спорттық этикаға қатысты жаңа тәртіптерді бекітті. Ведомство басшысының бұйрығына сәйкес, енді спортшылар мемлекеттік рәміздерге ерекше құрметпен қарауы қажет. Бұған қоса, қоғамдық орында мас күйінде жүруге, бейәдеп сөздер айтуға және ым-ишараны қолдануға тыйым салынады. Діни нанымдарын ашық насихаттау, өзгелерді діни бірлестіктердің жұмысына немесе миссионерлік әрекетке мәжбүрлеуге де шектеу қойылған.
Жаңа редакцияда қабылданған құжатта төреші шешіміне қарсы келмеу, жария түрде дау тудырмау, спорттық беделге нұқсан келтірмеу, БАҚ өкілдерінің жұмысына құрметпен қарау сияқты тетіктер бар. Аталған бұйрық 19 шілдеден бастап күшіне енеді.