Қазақстанда 2026 жылдың алғашқы тоқсанында қант диабетінің І және ІІ түрлері бойынша сырқаттану деңгейі өткен жылдың осы кезеңімен салыстырғанда төмендеді, деп хабарлайды Aqshamnews.kz тілшісі.
Денсаулық сақтау министрлігінің мәліметінше, биылғы алғашқы тоқсанда қант диабетімен сырқаттану көрсеткіші 100 мың тұрғынға шаққанда 308,7 жағдайды құраған. Ал 2025 жылдың осы кезеңінде бұл көрсеткіш 313,5 болған.
Ведомство мұны эндокринологиялық қызметтің күшеюімен және алғашқы медициналық-санитарлық көмек деңгейінде профилактикалық жұмыстардың жандануы нәтижесінде мүмкін болғанын айтады.
Қазір өңірлерде эндокриндік ауруларды анықтау, емдеу және алдын алумен айналысатын құзырет орталықтары ашылып жатыр. Сонымен қатар мамандандырылған бөлімшелердегі төсек-орын саны көбейтіліп, диабет мектептері мен арнайы кабинеттер іске қосылуда.
Министрлік дерегіне сүйенсек, 2026 жылдың алғашқы тоқсанында профилактикалық мақсатта алғашқы медициналық көмек ұйымдарына жүгінгендердің үлесі 33,4 пайызға жеткен. Бұл жоспарланған 27 пайыздан едәуір жоғары.
Сондай-ақ созылмалы аурулары бар науқастарды динамикалық бақылау жүйесі жетілдіріліп, жоғары сезімтал диагностикалық әдістер енгізілген. Соның нәтижесінде инфекциялық емес аурулары бар азаматтарды динамикалық бақылаумен қамту деңгейі 12 пайыздан 34 пайызға дейін артқан.
Дегенмен кейбір өңірлерде профилактикалық тексерулермен қамтудың төмендігі, ауруханаға жатқызуды ұзақ күту және жоспарлы көрсеткіштердің орындалмауы секілді мәселелер әлі де сақталып отыр.
Осыған байланысты Денсаулық сақтау министрі Ақмарал Әлназарова өңірлік денсаулық сақтау басқармаларына алғашқы медициналық көмек көрсеткіштерін ай сайын бақылауды, профилактикалық жұмысты күшейтуді және созылмалы ауруларға шалдыққан науқастарға көрсетілетін медициналық көмектің сапасын арттыруды тапсырды.