2026 жылғы 1 сәуірдегі жағдай бойынша Қазақстанда 31,1 мың отбасындағы 167,4 мың адамға 7,9 млрд теңге көлемінде атаулы әлеуметтік көмек тағайындалды, – деп хабарлайды aqshamnews.kz тілшісі.
2026 жылғы 1 сәуірдегі жағдай бойынша 31,1 мың отбасынан 167,4 мың алушыға жалпы сомасы 7,9 млрд теңгеге атаулы әлеуметтік көмек (АӘК) тағайындалды. Бұл туралы Еңбек және халықты әлеуметтік қорғау министрлігінің баспасөз қызметі хабарлады.
Ведомство мәліметінше, биыл бұл мақсатқа бюджеттен 62,7 млрд теңге қарастырылған.
Министрлік атаулы әлеуметтік көмектің негізгі мақсаты – ақшалай төлемдер беру және отбасының еңбекке қабілетті мүшелерін белсенді жұмыспен қамту шараларына тарту арқылы қиын өмірлік жағдайға тап болған отбасыларға қолдау көрсету екенін атап өтті.
АӘК бағдарламасына мыналар кіреді:
• табысы кедейлік шегінен төмен азаматтарға тоқсан сайын әлеуметтік көмек тағайындау;
• аз қамтылған отбасылардағы 1 жастан 6 жасқа дейінгі балаларға ай сайын әр балаға 1,5 АЕК мөлшерінде қосымша төлем беру. 2026 жылғы 1 сәуірдегі жағдай бойынша мұндай төлем 51,7 мың балаға тағайындалып, жалпы сомасы 942,1 млн теңгені құрады;
• жұмыспен қамтуға жәрдемдесу, соның ішінде жұмысқа орналастыру, жеке ісін ашуға гранттар беру, біліктілікті арттыру курстарына жолдау және өзге де қолдау шаралары.
АӘК алуға өтінішті мансап орталығы, тұрғылықты жері бойынша ауылдық округ әкімі немесе электрондық үкімет порталы арқылы беруге болады.